Aqtaý mańyndaǵy ushaq apaty: qazir qandaı jumystar atqarylyp jatyr
ASTANA. KAZINFORM – QR TJM baspasóz qyzmeti Aqtaý mańynda apatqa ushyraǵan ushaqqa qatysty sońǵy derekterdi jarııalady. Qazirgi ýaqytta oqıǵa ornynda ushaqtyń konstrýktsııalaryn bólshekteý jumystary jalǵasyp jatyr.
Oqıǵa saldaryn joıýǵa 306 adam, 101 birlik tehnıka, 2 áýe kemesi jáne 6 kınologııalyq eseptop jumyldyrylǵan. Jumystarǵa Tótenshe jaǵdaılar, Іshki ister, Qorǵanys mınıstrlikteriniń, Ulttyq ulannyń, memlekettik emes órtke qarsy qyzmettiń, Apattar medıtsınasy ortalyǵynyń, jedel medıtsınalyq kómek brıgadasynyń jáne jergilikti atqarýshy organdardyń, sondaı-aq Ázerbaıjan TJM qyzmetkerleri tartyldy.
QR TJM Apattar medıtsınasy ortalyǵynyń brıgadalary ushaq apatqa ushyraǵan jerde avarııalyq-qutqarý jumystaryn medıtsınalyq qamtamasyz etýdi jalǵastyrýda. Apattar medıtsınasy ortalyǵynyń psıhologtary Aqtaý qalasyna kelgen týystaryna psıhologııalyq kómek kórsetýde.
- Keshe avarııalyq-qutqarý jumystaryn júrgizý nátıjesinde Aqtaý qalasynyń medıtsınalyq mekemelerine 29 adam, onyń ishinde 3 kámeletke tolmaǵan qutqaryldy jáne aýrýhanaǵa jatqyzyldy. Qaza tapqandardyń 38 máıiti tabyldy, olar medıtsınalyq saraptama ortalyǵyna jetkizildi, olardyń ishinde 6 Qazaqstan azamaty jáne 3 ekıpaj múshesi bar. 7 adamnyń denesi anyqtaldy. Sonymen qatar keshe izdeý tobynyń nátıjesinde TJM qutqarýshylary qara jáshikti tapty. Oqıǵa ornynda táýlik boıy kezekshilik uıymdastyryldy.
Qazirgi ýaqytta Aqtaý qalasynda apattyń sebepterin tergeý jónindegi úkimettik komıssııa jumys istep jatyr", - dep jazdy TJM-nan.
Astana qalasyndaǵy Komandalyq ortalyqta jáne Mańǵystaý oblysynyń TJD-da jedel shtabtar men jedel jeli telefondary jumysyn jalǵastyrýda: 8-7172-55-96-21, 8-7172-55-96-83, 8-7292-31-90-91.
Jedel jeli telefondaryna shuǵyl psıhologııalyq kómek jáne aqparattyq sıpattaǵy 1 063 ótinish tústi.
Esterińizge sala keteıik, keshe 25 jeltoqsanda saǵat 11.00-de Baký-Groznyı baǵytynda ushyp bara jatqan Azerbaijan Airlines áýe kompanııasynyń áýe kemesindegi avarııalyq jaǵdaı týraly aqparat alǵan soń Aqtaý qalasy áýejaıynyń aýdanyna Qazaqstan TJM kúshteri men quraldary dereý jiberildi.
Saǵat 11.30-da áýejaıdan 3 km jerde ushaqtyń apatqa ushyraǵany týraly aqparat tústi.
Saldarynan ushaqtyń fıýzelıajynyń eki kóldeneń bólikke (qırandy arasyndaǵy qashyqtyq 300 m) aqaýy paıda boldy, sodan keıin ushqyshtar kabınasynyń mańynda órt shyqty.
Saǵat 11.35-te kelgen qutqarýshylar órtti sóndirýge kiristi, al saǵat 12.05-te órt tolyǵymen sóndirildi. Apat bolǵan jerdiń jalpy aýdany 4 200 sharshy metrdi qurady.
Ushaqtyń bortynda 67 jolaýshy, onyń ishinde 5 ekıpaj múshesi boldy.
Oqıǵa saldaryn joıýǵa Tótenshe jaǵdaılar, Іshki ister, Qorǵanys mınıstrlikterinen, Ulttyq ulannan, memlekettik emes órtke qarsy qyzmettinen, Apattar medıtsınasy ortalyǵynan, jedel medıtsınalyq kómek brıgadasynan jáne jergilikti atqarýshy organdardan 492 adam, 102 birlik tehnıka, 2 áýe kemesi jáne 10 kınologııalyq eseptop, onyń ishinde Astana qalasynan barǵan sanıtarlyq bort jumyldyryldy.