Aqtaýdaǵy ushaq apaty: ázerbaıjandyq BAQ qazaqstandyqtarǵa alǵys aıtyp jatyr

ASTANA. KAZINFORM – Tańerteń Aqtaý mańynda Ázerbaıjannyń ushaǵy apatqa ushyrady. Ushaq bortynda 69 adam bolǵan. Olardyń arasynda qazaqstandyqtar da bar.

Ázerbaıjandyq Minval.az aqparattyq portaly búgingi áýe apatyna qatysty aqparatty jedel taratyp jatyr. Taralyp jatqan aqparattyń kóbinde Qazaqstannyń resmı organdary men BAQ-qa silteme jasalǵan. 

— Qazaqstandyq qutqarý qyzmeti men dárigerlerdiń joǵary kásibıligine erekshe nazar aýdarý qajet. Barlyq jumys jedel júrgizilip jatyr. Qazaqstandyqtar jappaı qan tapsyryp jatyr. Olardyń kúsh-jigeri úshin alǵys aıtamyz. Raqmet, Qazaqstan, — delingen jelidegi habarlamada. 

Sondaı-aq AZAL áýe kompanııasy Qazaqstannyń apattan qutqarý qyzmeti barlyq qajetti kómekti jedel kórsetip jatqanyn habarlady.  

Aıta keteıik, Memleket basshysy Qasym-Jomart Toqaev Ázerbaıjan Prezıdenti Ilham Álıevke kóńil aıtty. 

Prezıdent ushaq apatynan zardap shekken azamattarǵa kómek kórsetýdi erekshe baqylaýda ustaýdy tapsyrdy. 

Odan bólek, QR Prezıdentiniń tapsyrmasymen áýe apatyna baılanysty memlekettik komıssııa quryldy.