Aqtaýdaǵy túzetý ortalyǵynda erekshe balalardyń quqyqtary buzylǵan

AQTAÝ. KAZINFORM – Aqtaý qalasynyń turǵyny Raısa Maratqyzy 9 jastaǵy erekshe ulyna 17-shaǵyn aýdanda ornalasqan túzetý ortalyǵynda qatygezdik kórsetilgenin málimdedi. 

Áıeldiń aıtýynsha, sońǵy 2 aıda balanyń denesi kógerip, soqqy izderi baıqalǵan. Ortalyqtyń beınebaqylaý kameralarynyń jazbalaryn qaraǵanda jattyqtyrýshylardyń balaǵa fızıkalyq kúsh qoldanyp, qatygezdik kórsetkenin kórgen.

– Keýde tusy kógerip keldi. Ol kezde begovoı dorojkada qulap qaldy dedi. 6 naýryz kúni taǵy da balamnyń baltyry eki jerden kógerip keldi. Jattyqtyrýshynyń urǵany vıdeoda kórinip tur. Julqyp, ishinen aıaqpen teýip jiberdi. Balam qulaǵyn basyp buryshta jylap otyrdy. Al sol kezde jattyqtyrýshy uıaly telefonyna úńilip tura bergen. Ekinshi vıdeoda balamdy kamerasy joq bólmege kirgizip alǵan. Ary qaraı ne bolǵany maǵan beımálim, - deıdi Raısa Maratqyzy.

Ananyń shaǵymynan keıin jaǵdaıdy Mańǵystaý oblysynyń bilim basqarmasy teksergen. Olar jeke menshik túzetý ortalyqtarynyń birinde balalardyń quqyqtarynyń buzylýyna qatysty eki jaǵdaı anyqtalǵanyn habarlady. 

– Atalǵan derek boıynsha qylmystyq is qozǵalyp, beınematerıaldar tárkilenip, sot-medıtsınalyq saraptamalar taǵaıyndaldy. Qazirgi ýaqytta mekeme jabyldy. Qazaqstan Respýblıkasy Oqý-aǵartý mınıstrliginiń balalardyń quqyqtaryn qorǵaý komıtetiniń tóraǵasy erekshe bilim berý qajettilikteri bar balalardyń ata-analarymen baılanysta. Jaǵdaı óńirdiń quzyrly organdarynyń baqylaýynda, - delingen habarlamada. 

Mańǵystaý oblystyq polıtsııa departamenti atalǵan oqıǵa boıynsha qylmystyq is qozǵalǵanyn rastady.

– Qazirgi ýaqytta bolǵan oqıǵanyń barlyq mán-jaıyn jan-jaqty, tolyq ári obektıvti anyqtaýǵa baǵyttalǵan qajetti tergeý áreketteri júrgizilip jatyr. Ótinish berýshiniń ýájderi tekserilip, beınebaqylaý kameralarynyń jazbalary zerttelip, mekeme qyzmetkerlerinen jaýap alynýda, - dep habarlady polıtsııa.

Buǵan deıin polıtsııa Jetisýda balany uryp-soqqan áıeldi ustaǵanyn jazǵan edik.