Aqtaýdaǵy suıytylǵan gaz tapshylyǵynyń sebebi belgili boldy
ASTANA. KAZINFORM — Aqtaý qalasyndaǵy gaz quıý beketterindegi uzyn-sonar kezek paıda boldy. Qalada gaz tapshylyǵy seziledi. Mańǵystaý oblystyq kásipkerlik basqarmasy jaǵdaıǵa qatysty túsinikteme berdi.
Basqarma taratqan aqparatqa sáıkes, Mańǵystaý oblysy — elimizdegi suıytylǵan munaı gazynyń (SMG) iri tutynýshylarynyń biri. Óńirdiń aı saıynǵy tutyný kólemi 18000 myń tonnany quraıdy.
Oblysqa SMG óniminiń negizgi bóligi ólkedegi Qazaq gaz óńdeý zaýytynan jetkiziledi, al jetispeıtin kólem Atyraýdaǵy zaýyttan bólinip otyr.
— Osy jyldyń qazan aıynda Atyraýdaǵy zaýytta josparly jóndeý jumystary júrgizilýine baılanysty qajetti 3 658 tonna ónim óńirge Aqtóbedegi zaýyttan jetkiziletin bolady. Buǵan deıin Atyraý zaýytynan ónimder avtokólik arqyly tasymaldansa, Aqtóbedegi zaýyttan tıep-jóneltý temir jol arqyly júzege asyrylady. Osyǵan baılanysty ónimniń óńirge jetý merzimi azdap keshigip keledi. Osy sebepti, qazan aıynda suıytylǵan gazdyń táýliktik jetkizilim kólemi tómendep, birqatar gaz quıý beketinde kólik kezekteri baıqalyp otyr. Atyraýdaǵy zaýyttyń jóndeý jumystary qazan aıynyń sońynda aıaqtalady. 1 qarashadan bastap suıytylǵan munaı gazynyń jetkizilýi tolyq qalypty rejımge qaıta oralady. Qazir ólkemizge Aqtóbenden 11 vagon keldi, kelesi 10 vagon 14-i kúni jolǵa shyǵady, — degen túsinikteme berdi vedomstvo.
Budan buryn suıytylǵan munaı gazyn eksporttaýǵa tyıym salý merzimi birneshe ret uzartylǵan edi.
Shildede Aqtóbede de suıytylǵan gazǵa kezek kóbeıgenin jazǵanbyz.