Aqtaýdaǵy sarbaz óliminen keıin birneshe laýazymdy tulǵa jaýapqa tartyldy
ASTANA. KAZINFORM — Qazir elordada Aqtaýdaǵy sarbaz ólimine qatysty sot ótip jatyr. Іstiń mán-jaıyn QR Qarýly kúshteri Qurlyq áskerleriniń bas qolbasshysy, general-maıor Mereke Kóshekbaev aıtyp berdi.
— Atalǵan fakti boıynsha qyzmettik tergeýdi Qorǵanys mınıstrliginiń basshylyǵy men Qorǵanys mınıstriniń orynbasary júrgizdi. Qazir is Astana qalasynyń áskerı sotynda qaralyp jatyr. Qylmystyq is boıynsha vzvod komandıri, leıtenant Dosovqa aıyp taǵylyp otyr, ol áskerı joǵary oqý ornynyń 2024 jylǵy túlegi, ótken jyldyń tamyz aıynda áskerı bólimde qyzmetke kiristi. Qyrkúıek aıynda Oımashy polıgonyna jiberildi, — dedi Mereke Kóshekbaev ortalyq kommýnıkatsııalar qyzmeti alańynda ótken baspasóz máslıhatynda.
Sondaı-aq, Qorǵanys mınıstrliginiń ókili, sarbaz ólimine qatysty birneshe laýazymdy tulǵanyń jaýapqa tartylǵanyn aıtty.
— Qorǵanys mınıstriniń buıryǵy negizinde «Batys» óńirlik qolbasshylyǵy áskerleriniń qolbasshysy general Artyqov jazalandy, «Batys» óńirlik qolbasshylyǵynyń áýe shabýylyna qarsy qorǵanys áskerleriniń bastyǵy qyzmetinen shettetildi, sonymen qatar úsh laýazymdy tulǵaǵa qyzmetine tolyq sáıkes kelmeıtindigi eskertilip, tórt ofıtser ártúrli tártiptik jazaǵa tartyldy, — deıdi qurlyq áskerleriniń bas qolbasshysy.
Eske sala keteıik, byltyr kúzde Aqtaýda oq jaraqatyn alǵan sarbaz mert boldy. Resmı aqparatqa súıensek, sarbaz qarýdy ustaý erejesin saqtamaý saldarynan jaraqat alyp, artynan qaıtys bolǵan.
Buǵan deıin habarlaǵanymyzdaı, áskerdegi tártip buzýshylyqtyń 70-80% beınebaqylaý kamerasynyń kómegimen anyqtalady.