Aqtaýdaǵy «MAEK» JShS-de tuz qyshqylynyń shashyraýynan 2 qyzmetker zardap shekti
AQTAÝ. KAZINFORM – Oqıǵa kondensatordy qyshqylmen tazalaý kezinde bolǵan.
– 2026 jylǵy 23 sáýir kúni shamamen saǵat 10:30-da ZPDıPTVS №1 tsehynda kásiporyn qyzmetkerleri – Baısagenov E.N. jáne Karabalaev E.A.-men jazataıym oqıǵa boldy. Aldyn ala málimetterge sáıkes, atalǵan qyzmetkerler GTPI-3 negizgi kondensatoryn (KO) qyshqylmen jýý jumystaryn júrgizgen. Tuz qyshqyly eritindisin berý qyshqyldy aıdaý sorǵysy arqyly shlangpen júzege asyrylǵan. Jumys aıaqtalyp, sorǵy ajyratylǵannan keıin shlangini sheshý (demontajdaý) barysynda tuz qyshqyly eritindisiniń shashyraýy (shyǵýy) oryn alyp, nátıjesinde eritindi tamshylary qyzmetkerlerdiń betine jáne kóz aımaǵyna tıgen, - delingen Memlekettik eńbek ınspektsııasy jónindegi komıtet habarlamasynda.
Zardap shekkender jedel túrde Aqtaý qalasyndaǵy Mańǵystaý oblystyq aýrýhanasyna medıtsınalyq kómek kórsetý úshin jetkizildi.
– Atalǵan jazataıym oqıǵa týraly jumys berýshi belgilengen tártippen Memlekettik eńbek ınspektsııasy departamentine habarlaǵan. Qazirgi ýaqytta alynǵan jaraqattardyń aýyrlyq dárejesi týraly medıtsınalyq qorytyndy kútilip otyr, - dep tolyqtyrdy Memlekettik eńbek ınspektsııasy jónindegi komıtet ókilderi.
Oqıǵa boıynsha tergep-tekserý memlekettik eńbek ınspektorynyń qatysýymen arnaıy tergep-tekserý nysanynda júrgiziledi.
– Alǵashqy medıtsınalyq tekserý nátıjeleri boıynsha Baısagenov E.N. jáne Karabalaev E.A.-nyń jaǵdaıy qanaǵattanarlyq dep baǵalandy. Baısagenov E.N.-di tekserý barysynda kórý organdaryna zaqymdaný belgileri anyqtalmaǵan, kózderiniń jaǵdaıy qalypty, osyǵan baılanysty aýrýhanaǵa jatqyzylmaı, úıine jiberildi.
Karabalaev E.A.-nyń jaǵdaıy da qanaǵattanarlyq dep baǵalanyp otyr. Sonymen qatar qosymsha tekserýden ótý maqsatynda ol Almaty qalasyndaǵy mamandandyrylǵan oftalmologııalyq mekemede tereńdetilgen tekserýden ótýdi josparlap otyr jáne osy maqsatta atalǵan qalaǵa ushýdy kózdeýde. Qazirgi kezde eki qyzmetkerdiń de jaǵdaıy turaqty, ómirine jáne densaýlyǵyna qaýip joq, - dedi zardap shekken jumysshylardyń jaǵdaıy týraly habarlaǵan Mańǵystaý oblysynyń densaýlyq saqtaý basqarmasy.
Eske sala keteıik, buǵan deıin Shymkentte jylytý maýsymynda 12 adam gazdan ýlanyp kóz jumǵanyn jazǵan edik.
