Aqtaýdaǵy MAEK kásipornynda eki jumysshynyń qyshqyldan kúıip qalý sebebi anyqtaldy
AQTAÝ. KAZINFORM – Mańǵystaý oblysynda «MAEK» JShS kásipornynda eki jumysshynyń tuz qyshqylynan kúıik alýyna baılanysty jazataıym oqıǵaǵa júrgizilgen tergeý aıaqtaldy. Tekserý barysynda eńbek qaýipsizdigi talaptarynyń buzylǵany anyqtalǵan.
Mańǵystaý oblystyq memlekettik eńbek ınspektsııasy departamentiniń málimetinshe, oqıǵa bıyl 23 sáýirde kásiporynnyń №1 tsehynda bolǵan. Eki jumysshy tuz qyshqylynan kúıik alǵan.
Tergeý nátıjesinde oqıǵanyń negizgi sebepteri retinde qaýiptiligi joǵary jumystardyń tıisti deńgeıde uıymdastyrylmaýy, jumysqa ruqsat berý narıadynyń bolmaýy, qyzmetkerlerdiń qajetti jeke qorǵanys quraldarymen qamtamasyz etilmeýi jáne jaýapty tulǵalar tarapynan baqylaýdyń jetkiliksizdigi anyqtalǵan.
Sonymen qatar komıssııa zardap shekken jumysshylardyń da kinásin belgiledi. Olar qaýipsizdik talaptaryn bile tura, qorǵanysh kózildiriginsiz jumysqa kirisken jáne qaýipti jaǵdaıda jumysty oryndaýdan bas tartpaǵan.
Tergeý qorytyndysy boıynsha oqıǵa eńbek qyzmetine baılanysty jazataıym jaǵdaı dep tanyldy. Komıssııa jumys berýshi, jaýapty laýazymdy tulǵalar men zardap shekken qyzmetkerler tarapynan zańbuzýshylyqtar bolǵanyn anyqtady.
Mundaı jaǵdaılardyń aldyn alý úshin jumys berýshige qaýipti jumystarǵa ruqsat berý narıadtaryn mindetti túrde rásimdeý, jeke qorǵanys quraldaryn paıdalanýdy qamtamasyz etý, qaýipti jumystardy oryndaý tártibin qaıta qaraý jáne qyzmetkerlerge qosymsha oqytý júrgizý usynylǵan.
Sondaı-aq óndiristik baqylaýdy kúsheıtip, kináli laýazymdy tulǵalardyń tártiptik jaýapkershiligin qaraý tapsyryldy.
Buǵan deıin, Aqtaýdaǵy «MAEK» JShS-de tuz qyshqylynyń shashyraýynan 2 qyzmetker zardap shekkenin jazǵan bolatynbyz.
