Aqtaýdaǵy qalyń tuman birneshe áýe reısiniń keshigýine sebep boldy
ASTANA. KAZINFORM — Aqtaýdaǵy qalyń tuman saldarynan áýejaıdyń jumysy buzylyp, birden birneshe áýe reısi keshikti. Keıbir jolaýshylar ushaqtaryn 11 saǵattan astam kútýge májbúr boldy.
FlyArystan áýe kompanııasynyń málimetinshe, reısterdiń keshigýine qolaısyz aýa raıy sebep bolǵan. Qalyń tuman saldarynan áýejaı mańyndaǵy kóriný qashyqtyǵy ushaqtyń qonýyna ruqsat etilgen eń tómengi deńgeıden tómendep ketken. Sonyń saldarynan áýe kemeleri qaýipsiz qonyp, usha almaǵan.
Tuman basqa reısterdiń de kestesine áser etti. Máselen, Almaty — Aqtaý baǵyty boıynsha ushqan áýe kemesi mejeli jerge qona almaı, Atyraý qalasyndaǵy qosalqy áýejaıǵa baǵyttalǵan.
Sonymen qatar áýe kompanııasy bir reıstiń keshigýi keıingi reısterdiń kestesine de yqpal etetinin túsindirdi. Sebebi bir áýe kemesi táýligine segiz reıske deıin oryndaıdy, al qonǵannan keıingi kelesi reıske daıyndalý aralyǵy nebári 30–45 mınýt.
Sonymen qatar áleýmettik jelide jolaýshylar uzaq ýaqyt kútken kezde qonaqúı berilmegenine shaǵymdandy.
FlyArystan ókilderi keshigýler tasymaldaýshyǵa baılanysty emes aýa raıy jaǵdaılarynan týyndaǵandyqtan, mundaı jaǵdaıda jolaýshylardy qonaqúıge ornalastyrý kózdelmegenin málimdedi.
Osy ýaqytta aqtaýlyqtar áleýmettik jelilerde erekshe tabıǵı qubylystyń áserli kórinisterin jarııalap jatyr. Dronmen túsirilgen beınejazbalarda qala men Kaspıı teńiziniń jaǵalaýyn qalyń aq tuman tolyqtaı kómkerip, qalanyń úırenshikti kelbeti bult tárizdi tuman astynda kózden tasa bolǵany baıqalady.
Buǵan deıin Oraldan Tashkentke qatynaıtyn áýe reısi toqtatylǵanyn jazǵanbyz.
