Aqtaýdaǵy evakýatsııalyq ortalyqta qansha qulsarylyq qaldy

AQTAÝ. KAZINFORM -  Atyraý oblysyndaǵy sý tasqyny kezinde Mańǵystaýǵa evakýatsııalanǵan turǵyndar búginde óńirdegi birneshe arnaıy pýknktterde turyp jatyr.

Oblys ákimdiginiń málimetinshe, qazirgi ýaqytta jıyrma evakýatsııalyq pýnktte barlyǵy myńnan astam qulsarylyq turǵyn ýaqytsha ornalasqan.

«Oblys boıynsha arnaıy ashylǵan 20 evakýatsııalyq pýnkt jumys istep tur. Olardyń barlyǵynda 1067 adam ýaqytsha turyp jatyr. Jalpy, óńir boıynsha evakýatsııalaý ortalyqtarynda 12 myń oryn bos oryn bar», - dedi Mańǵystaý oblysy ákiminiń baspasóz qyzmeti.

Al Aqtaý qalasynda búginde 600-den astam qulsarylyq turǵyn evakýatsııalyq ortalyqta turyp jatyr.

«Aqtaý qalasy aýmaǵyndaǵy evakýatsııalyq qabyldaý pýnktterinde 619 adam ornalasqan. Týystarynyń úılerine nemese ózderi ornalasqandar qulsarylyqtary sany 162-ni quraıdy», - Aqtaý qalasy ákimi apparatynyń tótenshe jaǵdaılar jáne azamattyq qorǵanys jónindegi bas ınspektory Manarbek Muhanbetov.

Sáýir aıynyń basynda Mańǵystaý oblysyna Jylyoı aýdanyndaǵy sý tasqyny saldarynan 27 myńnan astam adam kóshirilgen bolatyn.

Qulsaryda sý tasqynynan zardap shekkenderdi ornalastyrý úshin Jańaózen qalasynda 17 oryn daıyndalsa, Munaıly aýdanyndaǵy Mańǵystaý aýylynda 4 oryn, Mańǵystaý aýdanynda 12, Qaraqııa jáne Túpqaraǵan aýdandarynyń árqaısysynda 6 evakýatsııalyq oryn qosymsha ázirlendi. Al Aqtaý qalasyndaǵy 17 pýnktke qulsarylyqtar qonystanǵan edi.

Sonymen birge, oblys ákimi Nurlan Noǵaev Mańǵystaýǵa kóshirilgen 27 myń atyraýlyqtyń úshten biri úıine qaıtqanyn málimdedi. 

Keshe oblysta sý tasqynynan zardap shekkenderge gýmanıtarlyq kómek jınaý toqtatylǵany belgili boldy.