Aqtaýdaǵy aýyz sý tapshylyǵy qashan sheshiledi
AQTAÝ. KAZINFORM — Aqtaýda aýyz sý tapshylyǵy áli de ózekti. Jergilikti bılik tapshylyq tek jaz aılarynda degenimen kúzdiń ekinshi aıy bolsa da, áli kúnge deıin aýyz sýdyń qysymy tómen, sýsyz otyrǵan turǵyndar bar.
— Osy 27-shi shaǵynaýdannyń 28, 39 jáne 40-úılerinde sý máselesi ózekti. Bizde qysym óte tómen. Birinshi, ekinshi, úshinshi qabattarda sý bolýy múmkin, al odan joǵary qabattaǵy páterlerge múldem sý kelmeıdi, — deıdi Aqtaý qalasynyń turǵyny Bolatbaı Atashev.
Atqaminerler qalada aýyz sý tapshylyǵyn joıý úshin tamyz aıynyń sońyna deıin birqatar joba iske qosylatynyn málimdegen bolatyn. Biraq, keıbiriniń aıaqtalý merzimi keıinge shegerilgen. Máselen, Kaspıı sý tuşytý zaýytyn keńeıtý jumystary áli aıaqtalǵan joq.
Buǵan deıin 20 myń tekshe metr aýyz sý óndirip turǵan kásiporynnyń qýaty jospar boıynsha 40 myń tekshe metrge jetýi qajet.
— Jabdyqtar kesh jetkizildi. Sondyqtan jobany qarasha aıynyń sońyna deıin iske qosýdy josparlap otyrmyz. Sol kezde zaýyt táýligine 40 myń tekshe metr sý óndiretin bolady. Qazirgi tańda jumystyń 95 paıyzy aıaqtaldy. Jalpy kásiporyn Munaıly, Qaraqııa aýdandary men Aqtaý qalasy aýmaǵyndaǵy jyly jaǵajaıdy aýyz sýmen qamtıdy. Aldaǵy ýaqytta Aqtaý qalasyna da sý beretin bolamyz, — deıdi zaýyt dırektory Serik Gýsman.
Mańǵystaý oblystyq energetıka jáne turǵyn úı kommýnaldyq sharýashylyǵy basqarmasynyń málimetine súıensek, aımaqta aýyz sýǵa qatysty ahýal áli de kúrdeli.
Oblysqa orta eseppen táýligine 173 000 sharshy metr sý qajet. Qazirgi tańda aýyz sý tapshylyǵy táýligine 54 000 sharshy metrdi qurap otyr.
Aýyz sý tapshylyǵyn kezeń-kezeńimen sheshý úshin óńirde qýaty táýligine 140 500 sharshy metr bolatyn 9 sý tuşytý zaýyty men qondyrǵy qurylysy, 1 qondyrǵynyń jóndeý jumystary júrgizilip jatyr.
Buǵan deıin aımaq basshysy Nurdáýlet Qılybaı óńirde sý tuşytý zaýytyn salýǵa nıetti 2 sheteldik kompanııanyń zertteý júrgizip jatqanyn aıtqan bolatyn.
Onyń aıtýynsha, Mańǵystaý oblysynda sý tushytatyn zaýyt salyp berýge nıetti ınvestorlar kóp. Biraq, olardyń usynystary ákimdikke unap otyrǵan joq.
— Sebebi, olar «zaýyt salyp beremiz, satyp alasyzdar» deıdi. Ol bizge kerek emes. Biz «zaýyt salyńyzdar, monopolııaǵa qarsy memlekettik organdar tarıfińizdi bekitip beredi. Sol baǵamen halyqqa satasyzdar» deımiz. Qazir eki sheteldik kompanııa kelip, zertteý júrgizip jatyr, — dedi óńir basshysy.
Ákim osy jaz aılarynda óńirdegi sý tapshylyǵy táýligine 77 myń tekshe metrge jetkenin aıtady. Sondyqtan táýligine 20 myń tekshe metr sý tushytatyn Kaspıı sý tushytý zaýytynyń múmkindigi keńeıtilip jatyr.
