Aqtaýdaǵy arnaıy ortalyqta bala jaraqat alyp, tergeý bastaldy
ASTANA. KAZINFORM — Aqtaýdaǵy № 3 arnaýly áleýmettik qyzmet kórsetý ortalyǵynda psıhonevrologııalyq dıagnozy bar balalar arasynda oqys jaǵdaı oryn aldy. Oqıǵaǵa baılanysty qyzmettik jáne sotqa deıingi tergeý bastaldy, dep habarlaıdy Kazinform tilshisi.
Bul týraly aqparat áleýmettik jelilerde tarady. Balanyń anasynyń aıtýynsha, uly atalǵan ortalyqqa shamamen bir aı boıy barǵan. Keshke ata-anasy balasyn úıine alyp ketken kezde onyń arqasynan dene jaraqattaryn baıqaǵan.
Mańǵystaý oblystyq jumyspen qamtýdy úılestirý jáne áleýmettik baǵdarlamalar basqarmasynyń málimetinshe, oqıǵa 27 mamyr kúni bolǵan. Sol kúni kezekshi qyzmetker óz mindetin tıisinshe oryndamaǵandyqtan, balalar biraz ýaqyt qaraýsyz qalǵan.
Sondaı-aq ortalyq basshylyǵy men tárbıelenýshilerdiń ata-analaryna bolǵan jaǵdaı týraly der kezinde habar berilmegen.
Qazir arnaıy komıssııa qurylyp, qyzmettik tekserý júrgizilip jatyr. Onyń qorytyndysy boıynsha kináli qyzmetkerler men mekeme basshylyǵynyń jaýapkershiligi qaralady.
Mańǵystaý oblystyq polıtsııa departamenti atalǵan fakt tirkelip, sotqa deıingi tergeý bastalǵanyn habarlady.
— Oqıǵanyń barlyq mán-jaıy anyqtalyp, mekeme qyzmetkerleriniń áreketterine quqyqtyq baǵa beriledi, — dep málimdedi polıtsııa.
Osydan buryn Mańǵystaýda erekshe balalar emge kezegin jyldap kútip júrgenin jazǵan bolatynbyz.
