Aqtaýda zorlanǵan sportshy qyzdyń isine qatysty sot úkimi qashan shyǵatyny belgili boldy
AQTAÝ. KAZINFORM – Búgin, 30 qańtarda Mańǵystaý oblystyq sotynda Álına Serikovanyń isine qatysty appelıatsııalyq sot otyrysy ótti.
Marqumnyń inisi Baýyrjan Joljannyń aıtýynsha, sýdıa erteń tańerteń shýly iske núkte qoıylatynyn málimdegen.
- Búgin tek qorǵaýshylar sóıledi. Sýdıa erteń, 31 qańtarda saǵat 9-30 da úkim shyǵarylatynyn jarııalady. Biz basty sottalýshyny ómir boıy bas bostandyǵynan aıyrýdy, qalǵandaryna 15-16 jyldan jaza taǵaıyndaýdy surap, appelıatsııalyq shaǵym bergen bolatynbyz, - deıdi Baýyrjan Joljan.
Marqum Álına Serikovanyń otbasyn qoldaý úshin sot ǵımaratynyń aldyna týystary men dostary, qaıǵyly oqıǵaǵa beıjaı qaramaıtyn turǵyndar jınaldy.
- Sotty qaıta-qaıta yǵystyra berdi. Túsinbeı júrdik. Birese bir qylmyskerdiń qorǵaýshysy kelmeı qalady, endi birde qorǵaýshydan bas tartady. Búgin endi barlyǵy sheshiletin shyǵar degen úmitpen kelgen edik. Úkim erteń oqylatyn boldy. Biz ádiletti, tıisti jaza berilgenin qalaımyz, - deıdi marqum Álınanyń jeńgesi Ásııa Tegisbaeva.
Eske salaıyq, byltyr 18 mamyr kúni aqtaýlyq sportshy Álına Serikova kóp qabatty úıdiń toǵyzynshy qabatynan qulap, qaza tapqan bolatyn. 30 jastaǵy qyzdyń ózine qol jumsaýynyń sebebi keıin belgili boldy.
Qaıǵyly oqıǵadan úsh kún buryn, 14 mamyr kúni túnde jalǵyz kele jatqan Álına Serikovany 5 er adam kólikke kúshtep otyrǵyzyp, uryp-soǵyp, alyp ketken. Olar tań atqansha qyzdy qorlap, zábir kórsetip, zorlaǵan bolyp shyqty.