Aqtaýda zorlanǵan 6 jasar qyzdy ata-anasy Úndistan mamandaryna emdetpek
ASTANA. QazAqparat - Aqtaýda zorlanǵan 6 jasar qyzdyń ata-anasy emdeý ádisi medıtsınada moıyndalmaǵan úndistandyq mamandardyń kómegine júgingisi keledi. Bul týraly «University Medical Center» korporatıvtik qorynyń PR-menedjeri Danııar Meńlibekov málim etti, dep habarlaıdy «QazAqparat».
«Kishkentaı qyzdyń jaǵdaıy óte aýyr. Áli apparatpen jatyr, oń ózgerister joq. O basta aıtylǵandaı, mı baǵanyna jasap jatqan em esh áser etpeýde. Endi ata-anasy Úndistannan bir mamandardy ákelsek deıdi. Biraq, olardyń usynyp otyrǵan emdeý ádisi medıtsınada moıyndalmaǵan, tıisinshe Qazaqstanda tirkelmegen. Qazir osy másele týraly mınıstrlikpen aqyldasý sharasy júrip jatyr, - dedi D.Meńlibekov.
Eske sala keteıik, 20 tamyzda Aqtaýda alty jasar qyz joǵalyp ketti. Birneshe saǵattan keıin polıtseıler balany óndiristik aımaq aýdanynan tapty. Qyz bala oblystyq balalar aýrýhanasyna jatqyzyldy, oǵan ystyq ótken jáne denesinde kóptegen jaraqat bar. Dárigerler zorlaý faktisin qýattady, QR QK 120-babymen qylmystyq is qozǵaldy.
27 tamyzda alty jasar qyz Mańǵystaý oblystyq balalar aýrýhanasynan sanavıatsııamen Astanaǵa jetkizildi. 6 qyrkúıekte Aqtaý polıtseıleri 6 jasar qyzdy zorlaýǵa qatysty kúdiktini ustady. Ol óz kinásin moıyndady. Tergeý málimetinshe, onyń qyzdy zorlaǵanyn genetıkalyq saraptama da rastap otyr.
Búldirshin qyz Ana men bala ulttyq ǵylymı ortalyǵynyń balalar anestezıologııasy jáne jan saqtaý bóliminde jatyr. Nevrolog, balalar gınekology, pýlmonolog, okýlıst, nefrolog, endokrınolog, hırýrg sııaqty beıindi mamandardyń qatysýymen birneshe márte konsýltatsııa uıymdastyrylǵan.
Sonymen qatar, telemedıtsına arqyly Kembrıdj ýnıversıteti (Ulybrıtanııa) jáne Vena ýnıversıtetiniń (Avstrııa) professorlarymen keńes ótkizilgen.
