Aqtaýda jylý elektr ortalyǵynan órt shyǵyp, jumysshy qaza tapty
AQTAÝ. QazAqparat - Aqtaýdaǵy «MAEK-Qazatomónerkásip» kásipornynda gaz qurylǵysynana órt shyǵyp, bir adam qaza tapty, dep habarlaıdy QazAqparat tilshisi.
Nómiri ekinshi jylý elektr ortalyǵyndaǵy gaz qurylǵysyn jóndeý barysynda gazdyń qysymymen ot shyǵyp, 35 jastaǵy jumysshy sol jerde kúıip qalǵan. Sol kúıiktiń saldarynan ol aýrýhanada 5 kúnnen keıin kóz jumdy. Oqıǵanyń sebep-saldary anyqtalyp jatyr. Qaza bolǵan azamat osy mekemede 12 jyldan beri jumys isteıtin tájirıbeli maman bolatyn.
«Naýqas 12 jeltoqsanda oblystyq aýrýhanaǵa jatqyzyldy. Onyń denesiniń 50 paıyzyn kúıik shalǵan. Eseńgirep qalǵan bolatyn. Oǵan aldyn-ala termııalyq kúıik dıagnozy qoıyldy. Jansaqtaý bóliminde qajetti medıtsınalyq kómek kórsetilgenimen, ómirin saqtaý múmkin bolmady»,-deıdi oblystyq densaýlyq saqtaý basqarmasynyń baspasóz hatshysy Azamat Sársenbaev.
Al, mekeme ókili kimniń kináli ekeni anyqtalyp jatyr deıdi.
«Oqıǵa, bir sózben aıtqanda, tehnıkalyq qaýipsizdiktiń saqtalmaýynan oryn alǵan. Bul qatelik kimnen ketti? Jumysshynyń tarapynan ba, álde, soǵan jaýapty azamattardyń tarapynan ba - ony ınspektsııa qurǵan komıssııa anyqtaıdy. Biz ol týraly eshteńe aıta almaımyz»,-deıdi «MAEK-Qazatomónerkásip» JShS bas dırektorynyń qoǵammen baılanys jónindegi keńesshisi Qolǵanat Nurjaýbaıuly.
