Aqtaýda jylqylar qoqys konteınerlerinen azyq izdep júr

AQTAÝ. QazAqparat – Aqtaý qalasynda jylqylar qoqys tastaıtyn konteınerlerden azyq izdep júr, dep habarlaıdy QazAqparat Lada.kz saıtyna silteme jasap.

Rafael esimdi jergilikti turǵynnyń aıtýynsha, búgin, 22 tamyz kúngi tańnan beri ol jylqylardy 6-shy shaǵynaýdannan kórgen.

«Ash janýarlardyń butalardyń japyraqtaryn jeýi bir, qoqys konteınerlerinen azyq izdeý masqara ǵoı. Ieleriniń maldy óz betimen jibergeni me?», - dedi ol.

Eske sala ketsek, tamyzdyń basynda qala turǵyndary jylqy malynyń qalada kóptep júrýin vıdeoǵa túsergen. Janýarlar «Aqbota» saıabaǵynda, 8-shi shaǵynaýdandaǵy №14 úıdiń artynda jáne 6-shy shaǵynaýdandaǵy №21 úıdiń qasynda ósken aǵash butalaryn julyp jep júrdi. Taǵy bir aptadan keıin qaraýsyz júrgen maldyń jaǵalaý mańynda júrgeni baıqalǵan.