Aqtaýda jyl sońyna deıin eki bilim oshaǵy paıdalanýǵa beriledi

AQTAÝ. QazAqparat - Búgin oblys ákimi Serikbaı Trumov Aqtaý qalasynda qurylysy júrip jatqan birneshe áleýmettik nysandardy aralady. Óńir basshysy bilim mekemeleriniń, boks ortalyǵynyń jáne turǵyn úılerdiń qurylys jumysymen tanysty, dep habarlaıdy QazAqparat oblys ákiminiń baspasóz qyzmetine silteme jasap.

Bıyl sáýir aıynda qurylysy bastalǵan Shyǵys-1 turǵyn úı massıvindegi jalpy bilim beretin mekeme 300 oqýshyǵa arnalǵan. Bas merdiger - «Aqtaý NSh» JShS.

Al tehnıkalyq jumystardy «MańǵystaýQurylysInvest» JShS qadaǵalaıdy. Nysandy osy jyldyń sońyna deıin paıdalanýǵa berý josparlanǵan.

Odan ári oblys ákimi bastaǵan jumys toby shahardaǵy taǵy bir mekteptiń qurylys barysymen tanysty.

34-shaǵynaýdanda salynyp jatqan orta mekteptiń qurylysy 2019 jyldyń qarasha aıynda bastalǵan. 900 orynǵa shaqtalǵan nysan jyl sońyna deıin aıaqtalady. Qurylysqa jaýapty bas merdiger - «Ondasyn Stroı» JShS.

Aımaq basshysy Serikbaı Trumov merdigerlerge qurylys jumysyn sapaly oryndap, belgilengen merzimde aıaqtaýdy tapsyrdy.

Aımaq basshysy «Aqqý» 33-shaǵynaýdanda ornalasqan úshinshi kezektegi kóp páterli turǵyn úıdiń qurylys alańynda boldy. Qurylysqa jaýapty bas merdiger - «Kaskor-SMÝ» JShS, «Alıans Stroı LTD-R» JShS, «Evrostroı» JShS. Tehnıkalyq jabdyqtaý jumysyn «Nasıhat Qurylys» JShS júrgizedi.

Turǵyn úılerdiń qurylysy 2016 jyldyń qarasha aıynda bastaldy. Jalpy aýdany - 88 290 sharshy metr, al páterlerdiń jalpy aýdany - 53 438,28 sharshy metr. Páter sany - 670. Qurylys jumysyn aıaqtaý osy jyldyń jeltoqsan aıyna josparlanǵan.

Sonymen qatar óńir basshysy bastaǵan jumys toby 17-shaǵyn aýdandaǵy «Boks» ortalyǵynda boldy. Jobany North Caspian Operating Company N.V. qarjylandyrady. Tapsyrys berýshi mekeme: «MańǵystaýQurylysInvest» JShS. Bas merdiger - «Temirstroıservıs» JShS.

Jańa sport kesheniniń qurylysy 2018 jyldyń mamyr aıynda bastaldy. Munda bokspen ǵana emes, sonymen birge dzıýdo, taekvondo, kúres, aýyr atletıka sııaqty sport túrlerimen de shuǵyldanýǵa jaǵdaı jasalǵan. Syıymdylyǵy - 1500 adam.

Qazirgi kúni qurylys jumysynyń 90 paıyzy aıaqtalǵan. Nysan bıyl tamyz aıynyń sońynda paıdalanýǵa berilmek.