Aqtaýda jyl basynan beri 205 adam atyn ózgertken
ASTANA. QazAqparat - Aqtaý azamattyq hal aktilerin tirkeý bóliminiń málimetinshe, aǵymdaǵy jyldyń on aıynda qalanyń 205 turǵyny atyn ózgertken, dep habarlaıdy InAqtaý.
Sarapshylar adamdardyń shamamen 10%-i óz esimine kóńili tolmaǵandyqtan, al basqalar dinı nanym-senimine baılanysty ony ózgertedi. Endi bireýler sheteldikke uzatylyp bara jatqanda áke-sheshesiniń azan shaqyryp qoıǵan atyn aýystyrady. Qalaı degenmen de, jańa esim jańa ómir bastaýdyń negizi degen ustanym saqtalyp keledi.
«On jasqa deıin tólqujat málimetteri tegin ózgertiledi. 16 jasynda kýálik alǵannan soń tulǵanyń ózi Halyqqa qyzmet kórsetý ortalyǵyna júgine alady. Árıne, búgingi tańda bul protsedýra shamaly ýaqyt talap etedi. Degenmen, keleshekte onlaın-resýrstardyń kómegimen tólqujat málimetterin eki saǵattyń ishinde ózgertýge bolady», - deıdi Aqtaý qalasy AHAT bóliminiń basshysy Aısha Elemesova.
«Qazaqstan Aqtaý» telearnasynyń kórsetýinshe, ata-analar balasyna keıde eldegi mańyzdy oqıǵalarǵa oraı esim qoıady. Mysaly, taıaýda ǵana Astanada halyqaralyq mamandandyrylǵan EKSPO kórmesiniń qurmetine Báıdibekspo esimdi ul dúnıege keldi. Sonymen qatar jergilikti ımamdar perzentine mán-maǵynasyz esimderdi qoıýdan aýlaq bolýǵa keńes beredi.
«Balaǵa mán-maǵynasy joq esim qoıýǵa bolmaıdy. Modaǵa elikteýdiń qajeti joq, maǵynasy tereń, jóndi esim qoıý qajet», - deıdi Mańǵystaý oblystyq Ortalyq meshitiniń naıb ımamy Qalmuqan Qambaruly.
Aqtaý qalalyq AHAT bóliminiń málimetine qaraǵanda, 2017 jyly jeti myń bala tirkelgen, olardyń arasynda Álıhan, Dinmuhamed, Raıana, Káýsar esimderi meılinshe kóp taraǵan.
