Aqtaýda júıkege áser etetin zattardy jarnamalaǵan 5 adam sottaldy
AQTAÝ.KAZINFORM - Aqtaý qalalyq sotynyń úkimimen bes adam, onyń ishinde eki áıel, QR QK-niń 299-1-babynyń 2-bóligi boıynsha psıhotroptyq zattardy zańsyz jarnamalaǵany úshin kináli dep tanyldy.
Mańǵystaý oblystyq prokýratýrasy baspasóz qyzmetiniń habarlaýynsha, sottalǵandar Aqtaý qalasyndaǵy ǵımarattar men turǵyn úılerine paraqshalar japsyryp, sondaı-aq aldyn ala daıyndalǵan trafaretter arqyly aerozol boıaýymen daıyn mátinderdi qaldyrǵan.
Olar taratqan mátinderde psıhotroptyq zattar satatyn Telegram messendjerindegi mekenjaılarǵa siltemeler kórsetilgen.
Taratýshylardy qylmys ústinde polıtsııa qyzmetkerleri kezekti jarnamalyq materıaldarmen ustaǵan.
Jeke tintý kezinde eki adamnan mefedron psıhotroptyq zaty tárkilendi, olardyń áreketteri QR QK-niń 296-babynyń 3-bóligi boıynsha qosymsha saralandy. Beseýi de árqaısysy 3 jyl 6 aıǵa bas bostandyǵynan aıyryldy. Úkim zańdy kúshine endi.
- Mańǵystaý oblysynyń prokýratýrasy oblys turǵyndaryn aqsha tabýdyń kez kelgen kúmándi ádisterinen, atap aıtqanda, zańsyz áreketterdi nasıhattaýdan bas tartýǵa, sondaı-aq ózderine belgili barlyq daıyndalyp jatqan nemese jasalǵan qylmystyq quqyq buzýshylyqtar týraly quqyq qorǵaý organdaryna habarlaýǵa shaqyrady,-delingen habarlamada.
Osyǵan deıin Mańǵystaý oblysynda 80-nen astam adam qarjy pıramıdasynyń qurbany bolǵany týraly jazdyq.