Aqtaýda jurttan alaıaqtyq jolmen 2,8 mlrd teńge jınaǵan áıelder sottaldy

AQTAÝ. KAZINFORM – Aqtaýda turǵyndardan alaıaqtyq jolmen mıllıardtaǵan qarajat jınaǵan áıelder sottaldy. Biri — 9 jyl 8 aıǵa, ekinshisi — 6 jyl 8 aı merzimge bas bostandyǵynan aıyryldy.

Alaıaqtyq oqıǵa 2021-2023 jyldary bolǵan. Eki áıel «Whats App» jelisinde 25-top ashyp, adamdardy topqa tirkelýge shaqyryp, onda tómen baǵada ydys-aıaqtar men turmystyq tehnıkalardyń satylatynyn jarnamalap, sol arqyly jábirlenýshilerden taýar alýǵa túsken aqshalardy ıemdenip, óz qajettiligine jumsaǵan.

Sondaı-aq, olar qylmystyq jolmen ıemdengen aqshalardy zańdastyrý maqsatynda, jyljymaıtyn jáne jyljymaly múlikterge satý, satyp-alý kelisimsharttaryn jasaǵan.

Olardyń qylmystyq is-áreketteri saldarynan 294 jábirlenýshige 2,8 mıllıard teńgeden astam materıaldyq shyǵyn keldi.

Sotta eki áıeldiń de kinási jábirlenýshilerden jaýap alý hattamalarymen, aqsha aýdarymdarymen jáne istegi basqa da dáleldermen dáleldengen.

Sondyqtan A. QK-niń 190-babynyń 4-bóliginiń 2-tarmaǵymen, 218-babynyń 1-bóligimen kináli dep tanylyp, QK-niń 58-babynyń 3-bóligine sáıkes, túpkilikti múlki tárkilenip, 9 jyl 8 aı merzimge bas bostandyǵynan aıyryldy.

Al, B. QK-niń 190-babynyń 4-bóliginiń 2-tarmaǵymen 6 jyl 8 aı merzimge sottaldy.