Aqtaýda jumysshylarmen janjaldasqan ınternat dırektory qyzmetinen shettetildi
ASTANA. QazAqparat - Mańǵystaý oblystyq jumyspen qamtý jáne áleýmettik baǵdarlamalar basqarmasynyń basshysy Qýanysh Berishbaev múmkindigi shekteýli balalarǵa arnalǵan ınternat dırektory men jumysshylardyń janjaly túsirilgen vıdeoǵa qatysty pikir bildirdi, dep jazady Lada.
Basqarma basshysynyń sózine qaraǵanda, oqıǵa 7 maýsym kúni №3 Arnaıy áleýmettik qyzmetter kórsetý ortalyǵynda bolǵan.
«Ujymda dırektor men ınternat jumysshylary arasynda ózara sózge kelip qalǵan. Mańǵystaý oblystyq jumyspen qamtý jáne áleýmettik baǵdarlamalar basqarmasynyń buıryǵymen arnaýly komıssııa jasaqtaldy. Dúısenbi kúni tekseris bastalady. Mekemeniń dırektory laýazymynan ýaqytsha shettetildi. Óz qyzmetine qaıta ma, joq pa - komıssııanyń sheshiminen soń belgili bolady», - dedi Qýanysh Berishbaev.
Instagram áleýmettik jelisinde ınternat basshysy men jumysshylardyń janjaly túsirilgen vıdeo taraǵan bolatyn.
