Aqtaýda jumys ornyna qarýmen kelgen qyzmetker qamaýǵa alyndy
AQTAÝ. KAZINFORM – Aqtaýda bir kásiporynnyń qyzmetkeri keńsege «qarý men granataǵa uqsas zattarmen» kelgen.
Áleýmettik jelide taraǵan beınejazbada turǵynnyń «Intergaz Ortalyq Azııa» kompanııasynyń qyzmetkeri ekeni jáne onyń atys qarýy men granatamen janjalǵa kelgeni aıtylǵan.
Mańǵystaý oblystyq polıtsııa departamentiniń málimetinshe, oqıǵa 30 sáýirde bolǵan. Aqtaý qalasy polıtsııasynyń jedel basqarý ortalyǵyna kásiporyn aýmaǵynda granataǵa uqsas zatpen júrgen er adam týraly habar túsken.
Oqıǵa ornyna dereý jetken jedel-tergeý toby turǵynnyń kásiporyn qyzmetkeri ekenin anyqtap, odan granata men qarýǵa uqsas zattardy tárkilegen.
- Tárkilengen barlyq zat tekserildi. Aldyn ala málimet boıynsha olar pırotehnıkalyq buıymdar men peıntbolǵa arnalǵan qarý. Tyıym salynǵan zattar tabylǵan joq, - delingen habarlamada.
Alaıda, er adam mas kúıinde bolyp, bólimshege jetkizilgen. Sot oǵan esirtki zattaryn qoldanǵany úshin, 10 táýlikke ákimshilik qamaý jazasyn taǵaıyndaǵan.
- Osy oqıǵa boıynsha tergeý áreketteri jalǵasýda. Onyń qorytyndysy boıynsha tıisti protsessýaldyq sheshim qabyldanady, - delingen habarlamada.
Buǵan deıin, Aqtaý teńiz portynyń eks-basshysyna qatysty is: prokýror 8 jyl jaza surady.
