Aqtaýda júkti áıeldiń júregine ota jasaldy
Oblystyq aýrýhananyń dárigerleri aıaǵy aýyr kelinshekti ýltradybyspen zertteý kezinde atalǵan dıagnozdy qoıǵan bolatyn. Aq halatty abzal jandardyń aldynda ana men ómirge áli kelmegen sábıdi aman alyp qalý mindeti turdy.
Mańǵystaý oblystyq aýrýhanasy júrek-qan tamyrlary hırýrgııasy bólimshesiniń kardıohırýrgi Albert Abulhasovtyń aıtýynsha, júkti kelinshektiń ókpesiniń isip ketýine baılanysty onyń demalýy qıyndaı túsken. Búıregi men baýyryny aýyryp, jaǵdaıy dárigerlerdiń kóz aldynda nasharlaǵan. Dárigerler ózara aqyldasa kele, kesar tiligin jasaýǵa bel býǵan. Ota sátti jasalǵan soń ómirge deni saý er bala keldi. Al anasynyń qos jarmaly qaqpaqshasy tarylǵasyn protezdeý qajettigi týyndap, ashyq túrde júrekke ota jasaýǵa týra keldi.
Ota 5 saǵatta sozylǵan, eń bastysy nátıje jaman emes.
«Aýrýhanada eki apta jatyp emdelgen soń, áıeldiń jaǵdaıy jaqsarǵan kúnnen bastap balasymen birge úıine jiberildi. Dárigerlerge jıi habarlasyp otyrady jáne óziniń densaýlyǵy týraly málimet berip, qajettilik týyndasa olardyń keńesine júginedi. Aıta ketý kerek, oblystyq perınataldyq ortalyǵynyń jáne bizdiń aýrýhananyń kardıohırýrgtarynyń biliktiligin arqasynda osyndaı qıyn otany jasap shyqtyq. Sonymen qatar, oblystyq densaýlyq saqtaý basqarmasy da qajetti qoldaý kórsetip otyr», - deıdi Mańǵystaý oblystyq aýrýhanasynyń dırektory Bolatbek Qaıýpov.
