Aqtaýda júkti áıelderge arnalǵan járdemaqyny zańsyz rásimdegen býhgalter sottaldy
ASTANA. KAZINFORM – Aqtaý qalasynda júkti áıelderdi jalǵan jumysqa ornalastyrý arqyly memlekettik áleýmettik tólemderdi zańsyz alǵan alaıaqtyq isi boıynsha sot úkimi shyqty.
Іsti Qarjylyq monıtorıng agenttigi Mańǵystaý oblysy boıynsha departamenti tergegen.
Tergeý barysynda býhgalter óziniń kásibı bilimin paıdalanyp, júkti áıelderdi qoldaýǵa arnalǵan áleýmettik tólemderdi zańsyz alý shemasyn uıymdastyrǵany anyqtaldy. Ol Instagram áleýmettik jelisi arqyly ózin áleýmettik tólemderdi rásimdeý jónindegi maman retinde tanystyryp, járdemaqy kólemin ulǵaıtyp berýge ýáde etken.
- Atalǵan shemany iske asyrý úshin kúdikti týystary men tanystarynyń atyna naqty qyzmet júrgizbegen birneshe jeke kásipker tirkegen. Olardyń jáne tartylǵan tulǵalardyń elektrondyq tsıfrlyq qoltańbalaryn paıdalana otyryp, býhgalter jalǵan jumysqa qabyldaý týraly buıryqtar, esep aıyrysý tizimdemeleri, eńbek sharttary jáne ózge de býhgalterlik qujattardy rásimdegen. Osylaısha, zańdy eńbek qatynastary bar degen jalǵan kórinis qalyptastyrylǵan, - dep túsindirdi vedomstvodan.
Jalǵan málimetterdiń negizinde ýákiletti organdar tarapynan járdemaqylar negizsiz joǵary mólsherde taǵaıyndalǵan. Keıbir kásipkerler tólemderdi alǵannan keıin buryn aýdarylǵan zeınetaqy jáne áleýmettik aýdarymdardy keri qaıtarýdy rásimdegen.
Nátıjesinde memleketke 146 mln teńge kóleminde zalal keltirilgen.
Tergeý dereginshe, qylmystyq jolmen alynǵan qarajatqa úsh bólmeli páter satyp alynyp, oǵan tyıym salynǵan.
Sot úkimimen aıyptalýshy 5 jyl merzimge bas bostandyǵynan aıyryldy. Sonymen qatar atalǵan páter memleket kirisine tárkilendi.
Úkim zańdy kúshine endi.
Aıta keteıik, Qostanaıda qurylys kompanııasynyń basshysy alaıaqtyq jasady dep aıyptalyp otyr.
