Aqtaýda joǵalyp ketken 14 jastaǵy jetkinshek Jańaózennen tabyldy
AQTAÝ. QazAqparat - Aqtaýda joǵalǵan Eldar Seıt Jańaózennen tabyldy. Onyń ornalasqan jerin anasyna saýda dúkeniniń qyzmetkeri habarlaǵan. Bul týraly jasóspirimniń anasy Gúlnar Trapbekova aıtyp berdi, dep habarlaıdy QazAqparat tilshisi.
Anasynyń aıtýynsha, ulynyń joǵalyp ketkeni týraly habarlamany áleýmettik jelilerge taratqannan keıin birneshe adam habarlasqan. Solardyń biri ulyn saýda úıinen kórgenin aıtqan.
«Estigen boıda Jańaózenge jolǵa shyqtym. Menimen habarlasqan er adammen jolyqtym. Ol meniń ulymdy áleýmettik jelidegi habarlamadan kórip, tanyp qalǵan. Men qalaǵa kelgende ulym Eldardy polıtsııa ýchaskesine alyp ketken eken. Sondyqtan sol jaqqa bardym. Balamdy izdeýge atsalysqan barlyq azamattarǵa analyq alǵysymdy aıtam. Ne úshin ketkenin suraımyn»,-deıdi Gúlnar Trapbekova.
Eske salaıyq, 20 qarasha kúni 2004 jyly týylǵan Eldar Seıt joǵalyp ketken bolatyn. Ol úıinen kóshege oınaýǵa shyǵyp ketip, qaıtyp oralmaǵan. Sol kezde anasy ulynyń sýretin áleýmettik jelige júktep, «ústinde qara tústi sporttyq fýtbolka men kók tústi shalbar kıgen balamdy kórgen-bilgenderińiz bolsa, habarlasýyńyzdy suraımyz» dep habarlandyrý bergen bolatyn.
