Aqtaýda jylý jelisinde bolǵan apat kesirinen jasóspirim kúıip qaldy

AQTAÝ. KAZINFORM — Oqıǵa 4-naýryz kúni keshkisin 15 shaǵyn aýdan 13 úıdiń janynda bolǵan. Eskirgen qubyr jarylyp, ystyq sý atqylap jatqan jerge 11 jastaǵy jetkinshek qulap, kúıik shalǵan.

Jasóspirim Mańǵystaý oblystyq kópbeıindi balalar aýrýhanasyna jetkizilgen. Medıtsınalyq uıymnyń baspasóz qyzmetiniń málimetinshe, naýqas jansaqtaý bólimine jatqyzylǵan.

— 2014 jylǵy balanyń eki sany men baltyr aıaq basy aımaǵyn ІІ-ІІІ dárejeli kúıik shalǵan. Kúıgen jerdiń aýdany — 30%. Jasóspirimniń jaǵdaıy alǵan kúıik jaraqatyna baılanysty aýyr. Esi anyq, mazasyz. Reanımatsııa bóliminde emin alyp jatyr. Qazirgi tańda júrek soǵysy, tynys alýy birqalypty. Travmatologtarmen birge qaralyp, kúıik jarasyna hırýrgııalyq óńdeý jasaldy. Ázirge reanımatsııa bóliminde bolady, — delingen habarlamada.

«Kaspıı jylý, sý arnasy» mekemesi baspasóz qyzmetiniń habarlaýynsha, kásiporyn mamandary jylý jelisindegi apatty keıin bilgen.

— Árıne, kúni boıy sý tógilip, eshkim nazar aýdarmaıtyn nárse bolǵan joq. Belgi túsken boıda bizdiń mamandar baryp, túni boıy zardaptardy joıýmen aınalysty. Olar qorshaý qoıdy. Tańǵy saǵat tórtke deıin jumys istedi, qazir qazba jumystary júrgizilip jatyr, — delingen habarlamada.

Buǵan deıin, Mańǵystaýda ıtbalyqtar teńizdiń jaǵalaýyna shyǵyp ketkeni týraly jazǵan bolatynbyz.