Aqtaýda jylý jelileri qalaı jóndelip jatyr
AQTAÝ. KAZINFORM – Mańǵystaý oblysynyń ákimi Nurdáýlet Qılybaı Aqtaýdaǵy jylý jelilerinde júrgizilip jatqan jóndeý jumystaryn qarap, qala ákimine olardyń qarqynyn kúsheıtýdi tapsyrdy.
Mańǵystaý oblysy ákimi baspasóz qyzmetiniń málimetinshe, qazir magıstraldyq jelilerde aqaý joq. Biraq turǵyn úılerdiń mańyndaǵy taratý jelilerinde 35 aqaý anyqtalyp, olardy joıý jumystary jalǵasyp jatyr.
Búgingi kúni qaladaǵy barlyq 1500-deı turǵyn úıdiń 34-ne ǵana jylý berilmegen. Qazirgi tańda 21 ýchaskede jóndeý jumystary júrgizilip jatyr.
Jóndeý jumystaryna Jańaózen qalasynan 8 brıgada, Aqtaý qalasy ákimdiginen 27 adam jáne «Kaspıı jylý, sý arnasy» mekemesinen 11 brıgada tartylǵan. Barlyǵy 110 adam men 49 tehnıka jumyldyrylǵan.
Oblys ákimi Nurdáýlet Qılybaı tynymsyz eńbek etip jatqan kommýnaldyq mekeme qyzmetkerderine alǵysyn bildirip, aqaýdy tezdetip qalpyna keltirý kerektigin aıtty.
Aıta keteıik, bıyl Aqtaýda 50 jyl boıy jóndeý kórmegen 11,3 shaqyrym magıstraldyq jylý júıesiniń qubyrlary alǵash ret jańartyldy. Maqsat – tozyǵy jetken qubyrlardy aýystyryp, qala halqyn úzdiksiz jylýmen qamtamasyz etý.
Qalada jylý berý maýsymy 15 qazanda bastaldy.
