Aqtaýda jylý máselesi áli de ózekti bolyp otyr
AQTAÝ. KAZINFORM — Aqtaýdyń birqatar yqshamaýdanyndaǵy turǵyndar keıbir úılerde jylý joqtyǵyna shaǵymdanyp jatyr. Bul týraly olar Mańǵystaý oblysy ákimdiginiń Telegram chatynda jazǵan.
Arnaıy toptaǵy turǵyndardyń jazýynsha 27,29,30,33 syndy birqatar shaǵynaýdandaǵy kópqabatty keı úılerde jylýǵa qatysty másele týyndaǵan. Keı úıler kúni boıy jylýsyz otyrsa, ekinshileri qysymnyń azdyǵyna shaǵymdanyp jatyr.
«Kaspıı jylý, sý arnasy» MKK málimetinshe, qaladaǵy jylý jelilerine júrgizilgen gıdravlıkalyq synaqtar kezinde 39 aqaý anyqtalǵan. Jylý tasyǵysh toltyrylyp, júıe aınalym rejımine qosylǵannan keıin taǵy 172 aqaý tirkelgen. Kásiporyn atalǵan aqaýlardyń barlyǵy joıylǵanyn habarlady.
Sonymen qatar qaladaǵy ıesiz jáne teńgerimge berilmegen jylý jelilerinde de kemshilikter belgili bolǵan.
— Atalǵan jeliler «Kaspıı jylý, sý arnasy» MKK teńgeriminde joq jáne kásiporynnyń belgilengen paıdalaný jaýapkershiligi aımaǵyna kirmeıdi. Soǵan qaramastan, kepildik mindettemeleri aıasynda jáne turǵyndardy jylýmen turaqty qamtamasyz etý maqsatynda bul ýchaskelerde de jóndeý-qalpyna keltirý jáne retteý jumysy júrgizilýde, — dep habarlady «Kaspıı jylý, sý arnasy» mekemesiniń baspasóz qyzmeti.
Atalǵan jumys qalanyń jylý jelilerindegi gıdravlıkalyq rejımge áser etetindikten, jylýmen jabdyqtaý júıesin qosymsha retteý qajettiligi týyndap otyr.
— Turǵyndardy jylýmen qamtamasyz etý sharalary aıasynda ártúrli mekenjaılarda ornalasqan blokty-modýldik qazandyqtardy (BMK) iske qosyldy, -dep tolyqtyrdy «Kaspıı jylý, sý arnasy» MKK.
Kásiporyn kópqabatty úılerdiń turǵyndarynan túsken shaǵymdar negizinde TÚKSh bólimi jáne turǵyn úı ınspektsııasymen birlesip, úılerdiń jylytý júıelerin teksermek. Nátıjesinde jylýdyń birkelki taralýyn qamtamasyz etý jáne jylýmen jabdyqtaý sapasyn jaqsartý úshin ishki jylý toraptary men jylytý júıelerine qajetti retteý jumysy júrgiziledi.
Al qala ákimdigi buǵan deıin № 20 jáne № 23 mektepte de jylýmen jabdyqtaýǵa qatysty másele bolǵanyn habarlady. Qazirgi ýaqytta eki bilim berý mekemesine jylý qalypty rejımde berilgen.
Úkimet otyrysynda Premer-mınıstr Oljas Bektenov jylýdyń sapasyna narazy nemese jylýsyz qalǵan turǵyndar tarapynan shaǵymdar Aqtaý, Pavlodar men Petropavldan túsip jatqanyn aıtqan edi. Osyǵan oraı Premer-mınıstr óńir ákimderine jylý berý maýsymyna jaýapty óńirlik shtabtardyń jumysyn kúsheıtip, halyqtyń aryz-shaǵymdaryna jedel áreket etýdi tapsyrdy.
