Aqtaýda jylý berý maýsymy 7 qazannan bastalady

AQTAÝ. KAZINFORM — Jylý aldymen áleýmettik nysandarǵa berile bastaıdy.

«Kaspıı jylý, sý arnasy» mekemesiniń bas ınjeneri Serik Jalǵasbaıdyń aıtýynsha, jylý berý maýsymynyń birinshi kezeńi aıasynda qalanyń joǵarǵy jáne tómengi aımaqtaryndaǵy áleýmettik nysandar men zańdy tulǵalardyń jylytý júıeleri qosylady.

Al turǵyn úılerdi jylýmen qamtamasyz etý qala ákiminiń qaýlysyna sáıkes, 10 qazanǵa bekitildi. Buǵan deıin, 19-22 qyrkúıek aralyǵynda qala aýmaǵynda qubyrlarǵa gıdravlıkalyq synaq júrgizildi. Synaq kezinde shaǵyn aýdan ishilik qubyrlardan 60 aqaý anyqtalyp, jedel qalpyna keltirilgen.

Mańǵystaý oblystyq energetıka jáne turǵyn úı-kommýnaldyq sharýashylyǵy basqarmasynyń málimetinshe, 2025–2026 jyldardaǵy jylytý maýsymyna daıyndyqqa barlyǵy — 33,5 mlrd teńge bólingen. (Onyń 20,1 mlrd teńgesi jergilikti bıýdjetten, Úkimet rezervinen — 3,6 mlrd teńge, iri kásiporyndardyń (MAEK, MREK) menshikti qarajatynan — 9,8 mlrd teńge.)

— Injenerlik jelilerdi jóndeý jumystary boıynsha oblys kóleminde bıylǵy jyly jalpy uzyndyǵy — 29,2 shaqyrym jylý jelilerine kúrdeli jáne aǵymdaǵy jóndeý jumystary júrgizildi. Elektr jelileri boıynsha — 527,5 shaqyrym, gazben qamtý boıynsha — 558 nysan, sýmen jabdyqtaý boıynsha — 62,7 shaqyrym, káriz (sý burý) júıesi boıynsha — 37,6 shaqyrym, — delingen habarlamada.

Buǵan deıin, Túrik akteri Býrak Ozchıvıttiń Aqtaýda jankúıerlerimen kezdesýi dúrbeleń týǵyzǵany týraly jazǵan bolatynbyz.