Aqtaýda jylytý maýsymynda kommýnaldyq jelilerdi retteý máselesi kóterildi
AQTAÝ.KAZINFORM — Aqtaýda Otyrar City turǵyn úı kesheniniń turǵyndary jylýdyń bolmaýyna baılanysty narazylyq bildirdi. Qala ákimi Maqsat Muqash turǵyndarmen kezdesip, máseleniń sebebin túsindirgen. Onyń aıtýynsha, qurylys kompanııalary ınjenerlik jelilerdi tıisti mekemelerdiń teńgerimine ótkizbeı ketkendikten, qalada jylý, sý jáne elektr energııasymen qamtý máseleleri týyndaǵan.
Aqtaý qalalyq ákimdiginiń málimetinshe, 2026 jylǵy 4 qarashada saǵat 12:15–te 41-shaǵyn aýdandaǵy «Manhetten» turǵyn úı keshenine jylý beretin jeliden aqaý anyqtalǵan. Jóndeý jumysyn júrgizý úshin 20-shaǵyn aýdandaǵy Otyrar City turǵyn úı kesheniniń jylýmen jabdyqtaýy ýaqytsha toqtatylǵan.
Saǵat 20:15–te jóndeý jumysy aıaqtalyp, Otyrar City turǵyn úı keshenine jylý berý tolyq qalpyna keltirilgen. Alaıda saǵat 21:30 shamasynda atalǵan turǵyn úı keshenderiniń 30-ǵa jýyq turǵyny jylýdyń bolmaýyna alańdap, jınalǵan. Oqıǵa ornyna qala ákimi Maqsat Muqash baryp, turǵyndarmen kezdesti.
Ákimdik eki turǵyn úı keshenin salǵan qurylys kompanııasy ınjenerlik jelilerge qatysty qujattamany áli kúnge deıin jergilikti atqarýshy organǵa tapsyrmaǵanyn habarlady. Bul kópqabatty úıler jeke jylý qazandyqtarymen jabdyqtalǵan.
Qala ákimi turǵyndarmen kezdesý barysynda Aqtaýdaǵy kommýnaldyq ınfraqurylymǵa qatysty másele bir ǵana turǵyn úı keshenimen shektelmeıtinin aıtty.
— Buryn Aqtaýda 28 shaǵyn aýdan bolsa, qazir olardyń sany 42-ge jetti. Qala halqy 310 myń adamǵa deıin ósti. Merdiger mekemeler turǵyn úılerdi salyp bolǵan soń, ınjenerlik jelilerdi tapsyrmaıdy. Sonyń saldarynan qala boıynsha elektr energııasy, sý jáne jylýmen qamtý máselesi týyndap otyr. Moıyndaý kerek, qalada tok, sý, jylýǵa qatysty másele kóp. Buǵan qosa, keıbir jaýapty mekemelerdiń jumysynda da zańsyzdyqtar boldy, — dedi Aqtaý qalasynyń ákimi Maqsat Muqash.
Shahar basshysy ákimdiktiń endigi josparyn da aıtty.
— Qabyldanbaǵan ınjenerlik jelilerdi turǵyn úı-kommýnaldyq sharýashylyq bóliminiń teńgerimine alamyz. Zańǵa sáıkes, ákimdikke qarasty memlekettik mekemede bir jyl turady. Bir jyldan keıin jylý, sý, káriz jelilerin «Kaspıı jylý, sý arnasyna» beremiz. Elektr jelilerin Aqtaý elektr jelileri basqarmasyna ótkizemiz, — dedi qala ákimi.
Sonymen qatar ol Aqtaý elektr jelileri basqarmasynyyń basshysyna qatysty qylmystyq is qozǵalǵanyn aıtty. Jýyqta onyń ornyna jańa basshy taǵaıyndalǵan. Oǵan birqatar mindet júktelgen.
Buǵan deıin Atyraýda jylytý qazandyǵy jarylyp, bir adam aýrýhanaǵa jetkizilgenin jazǵan edik.
