Aqtaýda jıhaz tsehynda esirtki ekken turǵyn anyqtaldy

AQTAÝ. KAZINFORM – «Dármek» jedel-profılaktıkalyq is-sharasy aıasynda, Aqtaý qalasynyń ónerkásiptik aımaǵynan 52 jastaǵy er adam ustalǵan.

Tekserý barysynda onyń kúrtesiniń qaltasynan qoıma kiltteri tabyldy. Kúdikti sol qoımada esirtki zatyna jatatyn ósimdikterdi zańsyz ósirgen bolyp shyqty.

— Jıhaz tsehynyń qoımasyn tekserý kezinde esirtki qoldanýǵa arnalǵan qoldan jasalǵan qurylǵy, 11 sirińke qorabyna salynǵan marıhýana tuqymdary, elektrondyq tarazylar, otyrǵyzylǵan ósimdikteri bar 14 gúl qumyrasy, 35 túp marıhýana, 35 jaryq shamy, termometr, tyńaıtqyshtar, aýa tartqysh pen jeldetkishter tárkilendi, — delingen Mańǵystaý oblystyq polıtsııa departamenti taratqan habarlamada.

Saraptama qorytyndysyna sáıkes, tárkilengen ósimdikterdiń quramynda esirtki zattary bar ekeni anyqtylǵan.

Atalǵan derek boıynsha Qazaqstan Respýblıkasy Qylmystyq kodeksiniń 300-baby («Esirtki zattary bar ósimdikterdi zańsyz ósirý») boıynsha qylmystyq is qozǵaldy.

Buǵan deıin, ShQO turǵynynan 4 keliden astam marıhýana tárkilengeni týraly jazǵan bolatynbyz.