Aqtaýda jetkinshek jaǵajaıdaǵy batpaqqa batyp kete jazdady
AQTAÝ. KAZINFORM – Aqtaýda jaǵajaıda bala beline deıin batpaqqa batyp qalyp, ony eresekter qutqaryp qaldy.
Áleýmettik jelilerde taraǵan beınejazbada bastaýysh synyp jasyndaǵy balanyń qum men laı aralas batpaqqa belýardan batyp ketkeni kórinedi.
Oqıǵa 4A shaǵyn aýdanyndaǵy jaǵalaýda bolǵan. Batpaqtan shyǵa almaǵan balany alǵashynda áıel adam qutqarýǵa tyrysqan. Keıin kómekke er adam kelip, olar balany qaýipsiz jerge alyp shyqqan.
Osy oqıǵa baılanysty qala turǵyndary jaǵalaýdyń lastyǵyna, sonyń saldarynan batpaq paıda bolǵanyn aıtyp, áleýmettik jelilerde alańdaýshylyq bildirip jatyr.
Aqtaý qalasy ákimdiginiń málimetinshe, oqıǵa 2 maýsym kúni 4A shaǵyn aýdanyndaǵy «Brız» ıahta klýby aýmaǵynda bolǵan.
– Bul jaǵalaý aýmaǵy senimgerlik basqarýǵa berilgen jáne oǵan qyzmet kórsetý men paıdalaný jumysyn «Mangystau Project» JShS júzege asyrady. Qazirgi ýaqytta jaýapty uıymdarǵa atalǵan aýmaqta qaýipsizdikti qamtamasyz etý, sondaı-aq qalpyna keltirý jáne aldyn alý jumysyn júrgizý tapsyrylǵan. Jaǵdaı jergilikti atqarýshy organdardyń baqylaýynda, – deıdi Aqtaý qalasy ákimdiginiń baspasóz qyzmeti.
Eske sala ketsek, buǵan deıin Mańǵystaýda 12 jastaǵy bala qaıǵyly jaǵdaıda kóz jumdy.
