Aqtaýda jer asty qoqys jáshikterine qatysty baıqaý toqtatyldy

AQTAÝ. KAZINFORM — Aqtaý qalalyq turǵyn úı-kommýnaldyq sharýashylyǵy bólimi taratqan málimetke súıensek, ákimdik qalaǵa jer asty qoqys jınaý júıesin qoıý máselesin qaıta qarastyryp jatyr.

— Jer asty qoqys jáshikteriniń baıqaýy toqtatyldy. Basqa da nusqalary qaralyp jatyr. Aldaǵy ýaqytta múmkin múlde qoımaıtyn bolamyz. Nemese sanyn azaıtyp qoıamyz. Ázirge naqty sheshim qabyldanǵan joq. Biraq baıqaý toqtatyldy, — delingen habarlamada. 

Buǵan deıin, memlekettik satyp alý saıtynda Aqtaý qalasyna jerasty qoqys jáshikterin satyp alýǵa arnalǵan lot jarııalanǵan bolatyn. Onda 192 konteınerdiń árqaısysyn 4 642 857 teńgege satyp alý kózdelgen. Satyp alýdyń jalpy somasy qosylǵan qun salyǵynsyz 891,4 mıllıon teńge turady.