Aqtaýda Jeńis kúnine oraı jalǵyz ardagerge 5 mln teńge tólenedi
AQTAÝ. KAZINFORM — Aqtaýda Jeńis kúnine arnalǵan birjolǵy áleýmettik kómektiń mólsheri bekitildi. Tıisti ózgerister qalalyq máslıhattyń áleýmettik qoldaý kórsetý máseleleri jónindegi sheshimine engizildi.
Eń joǵary soma — 5 000 000 teńge — Ekinshi dúnıejúzilik soǵys ardagerlerine beriledi. Aqtaýda búginde nebári bir ǵana soǵys ardageri qalǵan. Ol — Olga Zarıvnıak.
Olga Zarıvnıak — 1927 jyly týǵan. Soǵys bastalǵan kezde Olga Platonovna nebári 14 jasta bolǵan. Jasyna qaramastan, ol týǵan qalasynda partızan otrıadynda baılanysshy bolǵan. Olga Zarıvnıak mańyzdy aqparattardy jetkizip, jaralanǵan sarbazdarǵa kómektesken. Ol «Ýkraınany fashıstik basqynshylardan azat etýdiń 60 jyldyǵy», «UOS-tyń 60 jyldyǵy», «UOS-tyń 65 jyldyǵy», «Otan qorǵaýshy», «Natsızmdi jeńýdiń 70 jyldyǵy», «Azat etýshi ardager», «Soǵys ardageri» mereıtoılyq medaldarymen marapattalǵan. Sondaı-aq «Erligi úshin» jáne «Uly Jeńis — 65 jyl» ordenderiniń ıegeri.
— Budan bólek, jaraqat, kontýzııa nemese mertigý saldarynan múgedektikke teńestirilgen tulǵalarǵa 259 500 teńge kóleminde tólem qarastyrylǵan. 216 250 teńgeden Ekinshi dúnıejúzilik soǵysyna qatysýshylarǵa teńestirilgen azamattarǵa, sondaı-aq basqa memleketter aýmaǵyndaǵy urys qımyldarynyń ardagerlerine tólenedi. 173 000 teńge mólsherindegi tólem alýshylardyń keń sanatyna arnalǵan. Olardyń qatarynda tyl eńbekkerleri, KSRO-nyń memlekettik nagradalarymen marapattalǵan azamattar, soǵys jyldarynda keminde alty aı jumys istegender, sondaı-aq qaza tapqan nemese qaıtys bolǵan áskerı qyzmetshilerdiń, partızandar men astyrtyn uıym músheleriniń otbasylary bar. Sonymen qatar, bul mólsherde tólem beıbit ýaqytta áskerı boryshyn óteý kezinde qaza tapqandardyń otbasylaryna, Chernobyl AES apatynyń saldaryn joıýshylardyń týystaryna, sondaı-aq soǵysqa qatysýshylardyń jesirleri men ata-analaryna da beriledi, — delingen habarlamada.
Aıta keteıik, áleýmettik kómek Jeńis kúnine oraı bir ret beriledi.
Buǵan deıin, jýsannan jáne gúl qaldyqtarynan erekshe buıymdar jasaıtyn Aqtaýlyq pedagog týraly jazǵan bolatynbyz.
