Aqtaýda jekemenshik mektepke qatysty shý shyqty
AQTAÝ. KAZINFORM — Aqtaý qalasyndaǵy «Ǵasyr» lıtseıiniń ata-analary oqý aqysyn keri qaıtarýdy talap etti.
Aıtýlarynsha, balalarǵa durys bilim berilmegen. Bilikti ustazdar jumystan shyǵyp ketip, oqýshylar muǵalimsiz qalǵan. Al, ata-analar bir bala úshin mektepke 1,5 mıllıon teńgeden qarjy tólengen.
— Barlyǵyna 1,5 mıllıon tóleńder dedi. Biz bólip tóleýdi suraǵanbyz, kelispedi. Bir jylǵa túgel tóleısińder, kelisimshartqa solaı otyramyz dedi. Sodan tóledik. Qarasha, jeltoqsan aılarynda synyby tarap ketti. Kýratorymyz da ketip qaldy. Qazir endi bulardyń synybynda 3 adam otyr. Meniń aqshamdy qaıtaryp bersin, biz basqa mektepke ketemiz, — deıdi ata-analardyń biri Aınur Seıdahmetova.
Ata-analar balalaryn sheteldik oqý ornyna túsirý úshin alǵashynda «Foýndeıshn» ortalyǵynda oqytqan. Sol ortalyq keıin «Ǵasyr» lıtseıin ashyp, barlyq oqýshy sonda aýysqan. Alaıda, ýaqyt óte muǵalimder shetinen jumystan ketip, oqýshylardyń sabaq úlgerimi men tártibi nasharlap ketken.
— Men balamnyń bilim deńgeıin kóteresiz be, bilim jaqsy berile me degenimde, meniń qolymdy ustap turyp, ýáde berdi. Jeltoqsanǵa deıin bári durystalady, ekinshi toqsandy oıdaǵydaı bitedi dedi. Eshteńe de bitken joq. Endi eshkim telefonǵa jaýap bermeıdi. Jazylǵan aryzǵa qol qoıylmaı jatyr, aqshany bermeımin dep otyr, — deıdi ata-ana Aqmaral Karım.
Atalǵan mektepte jumys istegen muǵalimderdiń arasynda jalaqylaryn ala almaı júrgender de bar bolyp shyqty. Oǵan qosa, zeınetaqy jarnasy men mindetti áleýmettik medıtsınalyq saqtandyrý tólemi tólenbegen.
— 25 muǵalim shyǵyp ketti. Bizdiń talabymyz — qyrkúıekten bergi zeınetaqy jarnasy men mindetti áleýmettik medıtsınalyq saqtandyrý tólemderin aýdarýdy suraımyz. Biz qazir aýada júrmiz pensıonnyı, medstrahovka tólenbegen. Dárigerge aqyly qaralyp júrmiz. Jumystan shyqsaq ta qańtardyń jalaqysy men esep aıyrysý alǵan joqpyz, — deıdi dene shynyqtyrý pániniń muǵalimi Naz Shafık.
Jeke mekteptiń quryltaıshysy ıAkýb Halyqberdıevtiń aıtýynsha, ata-analar men muǵalimderdiń qarajattary qaıtarylady.
— Aqtaý qalasynda 4 aı bolǵan joqpyn, bul 4 aıdyń ishinde bolyp jatqan jaǵdaı. Qazirgi tańda aılyqqa kelsek, barlyq aılyq tólengen. Biz jalaqyny maýsym aıynan bastap tólep jatyrmyz, memleketimiz bizge osy qarashadan bastap tóleýde. Onyń aldyndaǵy aılarǵa tólengen joq. Ata-analarmen jınalys boldy, jınalysta barlyq esep berildi. Bul másele bir aptanyń ishinde sheshiledi. Dúısenbiden bastap sabaqtar tolyqtaı ótedi, — deıdi ol.
Osy jaǵdaı boıynsha ata-analar Aqtaý qalalyq prokýratýraǵa shaǵym túsirdi. Shaǵym qaralýda.
Buǵan deıin, Mańǵystaýda balabaqsha dırektory 3 jylǵa bas bostandyǵynan aıyrylǵany týraly jazǵan edik.