Aqtaýda jedel járdem qyzmetkerleri planshetpen jabdyqtaldy
AQTAÝ. QazAqparat - Aqtaý qalalyq jedel járdem brıgadasyna quny 11 mıllıon teńge bolatyn 20 planshet tartý etildi. Planshetter jedel járdem stansasy dıspetcherlik qyzmetiniń «ADIS» BK avtomattandyrý baǵdarlamasymen ıntegratsııalanǵan, dep habarlady «QazAqparat» HAA tilshisi.
«Qymbat planshetter alyndy, oǵan jedel járdem kezeńindegi medıtsınalyq kómek kórsetýdiń barlyq standarttary engizilgen. Dárilik zattardyń ataýy men mólsherlemesi kórsetilgen farmatsevtıkalyq anyqtama jáne medıtsınalyq anyqtama bar. Planshetter arqyly dıspetcherlik ortalyqpen spýtnıktik baılanys ornatýǵa bolady, ár brıgadaǵa túsken shaqyrtýlardyń ýaqyty tirkeledi jáne ózge de qyzmetter onlaın júzege asyrylady», - dep túsindirdi «Aqtaý qalalyq jedel járdem jáne jedel medıtsınalyq kómek stansasy» ShJQ MKK dırektory Bolat Taıshybaev.
Al jedel járdem kólikteri naýqasqa tezirek jetý maqsatynda GPS-navıgatsııa júıesimen jabdyqtalǵan.
Kómek brıgadasyna berilgen jaqsy kólik tabysty jumystyń kepili ekeni belgili. Jaqyn kúnderi Mańǵystaý oblysynyń aýrýhanalaryna 11 dana «VAZ» markaly avtokólikteri berildi. Olardyń arasynda Jetibaı, Munaıly jáne Qaraqııa aýdandarynyń aýyldary, Fort-Shevchenko qalasy jáne ózge de eldi mekender bar.
