Aqtaýda jaz bastalǵaly jaǵymsyz ıis kúsheıdi
AQTAÝ. KAZINFORM — Aqtaý qalasynda jaǵymsyz kúkirtsýtek ıisi qaıta sezile bastady. Mamandar ıis KOS-2 jáne Qoshqar ata qaldyq qoımasynan kelip jatqanyn aıtty.
Mańǵystaý oblystyq ekologııa departamentine kún ysyǵaly qala turǵyndarynan jaǵymsyz ıiske qatysty shaǵym kóbeıgen. Sondyqtan departamenttiń zerthanalyq-taldamalyq baqylaý bóliminiń mamandary 12 maýsymnan 13 maýsymǵa qaraǵan túni Aqtaý — Aqshuqyr avtojoly boıynda atmosferalyq aýa quramyna ólsheý jumystaryn júrgizgen. Atalǵan aýmaq Qoshqar ata qaldyq qoımasyna jaqyn ornalasqan.
Ekologtardyń aldyn ala boljamy boıynsha jaǵymsyz ıistiń negizgi kózderi — KOS-2 nysany (káriz-tazartý qurylystary kesheni) men Qoshqar ata qaldyq qoımasynyń suıyqtyq jınalǵan aýmaǵynan bolýy múmkin. Naqty qorytyndy zerthanalyq taldaý nátıjeleri shyqqannan keıin belgili bolady.
Aıta keteıik, bul másele byltyr da kóterildi. Sol kezde zertteý júrgizilip, mamandar jaǵymsyz ıistiń Qoshqar ata qaldyq qoımasyndaǵy suıyq fazadan ekenin aıtqan bolatyn. Sebebi, oǵan KOS-2-den jetkilikti deńgeıde tazartylmaǵan káriz sýlary jiberilip jatyr.
Mamandardyń aıtýynsha, joǵary temperatýra kezinde qaldyq qoımadaǵy suıyqtyqtan bólinetin býlar turaqty jaǵymsyz ıistiń taralýyna áser etedi. Soltústik baǵyttaǵy jel ony qala aýmaǵyna jetkizedi.
Oblystyq energetıka jáne turǵyn úı-kommýnaldyq sharýashylyǵy basqarmasynyń málimetinshe, qazirgi tańda Qoshqar ata qoımasyna taza sý jiberilip jatyr.
- KOS-2 nysanynda qurylys jumystary aıaqtaldy. Jyl basynan beri Qoshqar ata radıatsııalyq qaldyqtar qoımasyna tazartylǵan sý jiberilýde, — delingen habarlamada.
Buǵan deıin, Atyraý turǵyndary jaǵymsyz ıisten mezi bolǵandaryn aıtyp, shaǵymdanǵan bolatyn.
