Aqtaýda jasóspirim qyzdy uryp-soqqandar ustaldy

AQTAÝ. KAZINFORM – Áleýmettik jelide jasóspirim qyzdyń ózi qatarlas qyzdy basynan uryp jatqan beınejazbasy jáne jasóspirimderdiń ata-analarynyń oqıǵaǵa qatysty aıtqan sózderi tarady.    

Ata-analardyń aıtýynsha, qalada jasóspirim qyzdardan quralǵan top bar. Olar jetkinshekterdi qataryna qosyp alady. Eger kóńilderinen shyqpasa, qysym kórsetip, urady. 

– Meniń qyzym aqymaqtyq jasap, solardyń qataryna qosylǵan. Ol qyzdar saýda ortalyqtarynyń janynda júrip, jetkinshekterdi sózge tartyp, sulý, sándi qyz ekenin aıtyp, dos bolýǵa shaqyrady. Balalar qyzyǵyp qosylyp ketedi. Ýaqyt óte olar manıpýlıatsııa jasap, qorqytyp, úrkitedi eken. Sonyń bárin beınejazbaǵa túsirip, jelige júkteıdi, - deıdi ata-analardyń biri. 

Taǵy bir ata-ana sotqar qyzdarǵa qatysty bir oqıǵany aıtyp berdi. 

– Maǵan bir tanysym 12 jastaǵy qyzymdy saýda ortalyǵynyń qasynda uryp jatyr dep qońyraý shaldy. Qyzyma telefon soqsam, kótermeıdi. Qas qaraıǵan kez edi. Joldasym ekeýmiz birden aıtqan jerge bardyq. Kelsek 20-30 jasóspirim júr. Túsingenim bir top qyz sol kezde 2 jasóspirim qyzdy uryp tastaǵan. Meniń qyzym zardap shekpepti. Biz birden polıtsııa shaqyrdyq, - deıdi ekinshi ata-ana. 

Mańǵystaý oblystyq polıtsııa departamenti baspasóz qyzmetiniń habarlaýynsha, uryp-soǵý deregi boıynsha sotqa deıingi tergeý bastalǵan. Oqıǵaǵa qatysty barlyq kúdikti anyqtalyp, ustalǵan. 

– Kúdiktilerdiń zańdy ókilderi kámeletke tolmaǵan balany tárbıeleý, olardyń quqyqtary men múddelerin qorǵaý, olardyń qaýipsizdigin qamtamasyz etý jónindegi sharalardy oryndamaý deregi boıynsha ákimshilik jaýapkershilikke tartylatyn bolady. Materıal ákimshilik janyndaǵy kámeletke tolmaǵandardyń quqyqtaryn qorǵaý jónindegi komıssııaǵa jiberiledi. Quqyq buzýshy jetkinshekter profılaktıkalyq esepke qoıyldy. Qazirgi ýaqytta oqıǵanyń mán-jaıyn anyqtaý úshin jan-jaqty tergeý áreketteri júrgizilýde, - delingen habarlamada. 

Buǵan deıin, Mańǵystaýlyq paralımpıadashylardyń máselesi týraly jazǵan bolatynbyz.