Aqtaýda «Jasyl el» jasaǵyna qujat tapsyrý kezinde 5 adam qysylyp qaldy
AQTAÝ. KAZINFORM — Búgin Aqtaýda «Jasyl el» jasaǵyna qujat tapsyrýǵa halyq óte kóp jınalyp, 5 adam qysylyp qalǵan. Olarǵa medıtsınalyq kómek qajet bolyp, dereý jedel-járdem shaqyrylǵan.
Turǵyndar qujat qabyldaýdyń durys uıymdastyrylmaǵanyna shaǵymdandy.
–Tańǵy saǵat 6-da kelgenimizde kezek tizimi jasalyp jatqanyn kórdik. Tizimge jazyldyq. Keıin eki túrli tizim bar ekeni belgili bolyp, qaıta jazylýǵa týra keldi. Saǵat 9-ǵa qaraı kireberiste adam óte kóp jınaldy. Erterek kelip, kezekte turǵandardyń ózi ishke kire almady. Qujat qabyldaýdy onlaın formatta uıymdastyrýǵa nemese tártipti durys qamtamasyz etýge bolmaı ma? – deıdi Aqtaý turǵyny.
Aqtaý qalalyq qoǵamdyq damý ortalyǵynyń dırektory Serik Jomartovtyń aıtýynsha, kezek saqtalmaı, turǵyndardyń bir-birine qysym kórsetýinen 5 áıel zardap shekken.
- Halyqtyń óte kóp kelýinen, adamdar arasynda túsinispeýshilik, daý týyndap, kezekti saqtamaı, bir-birine qysym kórsetýine baılanysty 5 adam jaǵdaıy nasharlap jedel-járdem shaqyryldy. Kómek kórsetilip, jaǵdaılary turaqtaldy. Olardyń qujattary qabyldandy. «Jasyl el» eńbek jasaǵyna qujat qabyldaý aıaqtaldy. Qazir jaǵdaı turaqty, - deıdi ol.
Buǵan deıin, Mańǵystaýda erekshe balalar emge kezegin jyldap kútýge májbúr ekeni týraly jazǵan bolatynbyz.
