Aqtaýda jas dárigerler baspana sertıfıkatyn aldy
AQTAÝ. QazAqparat - Medıtsına qyzmetkerleriniń kásibı merekesine oraı ótken saltanatty jıynda birqatar aqtaýlyq jas mamandarǵa baspana sertıfıkattary berildi, dep habarlaıdy QazAqparat tilshisi.
Búgingi merkede qos qýanyshty toılaǵan oblystyq balalar aýrýhanasynyń meıirbıkesi Gúlaıym Alpamys erekshe qýanyshqa keneldi. Ol «SENIM» medıtsınalyq qyzmetkerleriniń kásibı odaǵy arqyly turǵyn úı alý úshin alǵashqy jarna tóleýge 1 400 000 tg kóleminde qarjy aldy.
«Erekshe qýanyshtymyn! Men kópten kútken páterimdi osy Aqtaý qalasynan buıyrsa alýdy josparlap otyrmyn. Bárińizge alǵys aıtamyn! Mundaı jańalyqty kútpep edim. Merekede erekshe syı boldy!» - deıdi Gúlaıym Alpamys.
Gúlaıymmen qatar Aqtaý qalalyq №2 emhanasynyń jalpy tájirıbelik dárigeri Maqsat Cheleev, Aqtaý qalalyq №1 emhanasynyń jalpy tájirıbelik dárigeri Alesıa Amestratenko, Mańǵystaý oblystyq aýrýhanasynyń kardıolog-dárigeri Móldir Shambılova 3 mln teńge kóleminde qarajatty ıelendi.
Sondaı-aq, saltanatty jıynda 40-qa jýyq sala qyzmetkeri «Eńbek Ardageri», QR Densaýlyq saqtaý mınıstriniń «Densaýlyq saqtaý isiniń úzdigi», «Densaýlyq saqtaý isine qosqan úlesi úshin» tósbelgisimen marapattaldy.
Aıta keteıik, Mańǵystaýda byltyr salany damytýǵa 27 mlrd teńge, bıyl 30 mlrd teńge qarajat bólingen. 250 orynǵa arnalǵan ana men bala ortalyǵy ashylyp, Jańaózen men Beıneý aýrýhanasynda búırek aýrýyn emdeıtin bólimshe paıdalanýǵa berilgen.
«2011 jyldan beri turalap qalǵan oblystyq onkologııalyq dıspanserdiń qurylysy qaıta jandandyrylyp jatyr. Munaıly aýdanynda halyq sany artýda. Qazirdiń ózinde 170 myń turǵyn bar. Sondyqtan 4,9 mlrd teńgege 300 oryndyq aýrýhana salý týraly sheshimder qabyldandy. Óziniń júrek qalaýymen kelgen aq halatty jandardy merekelerińizben quttyqtaımyn!» - deıdi sharaǵa arnaıy kelgen Mańǵystaý oblysy ákiminiń orynbasary Rýslan Sákeev.
