Aqtaýda jas áskerı ushqysh áýe shekarasyn qorǵap júr

Osyndaı kúrdeli tehnıkany áýede erkin meńgerý tyńǵylyqty daıyndyqty, joǵary sheberlik pen tózimdilikti talap etedi. Osyndaı jaýapty salany tańdaǵan jas mamandardyń biri — ushqysh Álı Orynbaev. Ol — eki márte Keńes Odaǵynyń Batyry Talǵat Bıgeldınov atyndaǵy Áýe qorǵanysy kúshteri Áskerı ınstıtýtynyń túlegi.

Búginde Aqtaý qalasyndaǵy avıatsııalyq bazada ornalasqan № 30153 áskerı bóliminde qyzmet atqaryp, elimizdiń áýe shekarasyn qorǵaýǵa úles qosyp keledi.

Aqtóbe qalasynyń týmasy, jas ushqysh, aǵa leıtenant Álı Orynbaev tikushaqpen 350 saǵattan astam áýede ushqan. Áskerı ushqyshtar úshin bul — eleýli tájirıbe kórsetkishi. Ol oqý barysynda-aq ushý mashyqtaryn meńgerip, búginge deıin Mı-8, Mı-17 jáne Mı-171Sh tikushaqtaryn basqarǵan.

Álı óz ómirin erte jastan-aq avıatsııa salasymen baılanystyrady. Ol bala kúninen kók júzine kóz tigip, qalyqtaǵan ushaqtarǵa qyzyǵa qarap, sol bıikti baǵyndyrýdy armandap ósken.

— Ákem — Áýe qorǵanysy kúshteri Áskerı ınstıtýtynyń 2001 jylǵy túlegi. Anam da osy áskerı salada qyzmet etedi, al ákem uzaq jyldar boıy atalǵan ınstıtýtta eńbek etti. Meni jıi aerodromǵa ertip aparyp, ushaqtar men tikushaqtardyń áýege qalaı kóteriletinin kórsetetin. Sol sátterden bastap avıatsııaǵa degen erekshe qyzyǵýshylyǵym oıanyp, bolashaǵymdy osy salamen baılanystyrýǵa nyq sheshim qabyldadym. Ákemniń izin qýyp, 2019 jyly áskerı áýe oqý ornyna tústim. 2023 jyly Áýe qorǵanysy kúshteriniń Áskerı ınstıtýtyn memlekettik avıatsııada áýe kemeleri men tikushaqtardy ushý arqyly paıdalaný mamandyǵy boıynsha támamdap, leıtenant áskerı ataǵyn ıelendim, — deıdi Álı.

Jas ofıtser tek jaýyngerlik daıyndyqpen ǵana emes, tótenshe jaǵdaılar kezinde de belsendilik tanytyp keledi. Aqtóbe óńirindegi sý tasqyny kezinde áskerı ushqyshtar apat aımaǵyna alǵashqylardyń biri bolyp jetip, qutqarý jumystaryna qatysqan. Álı Orynbaev ta ekıpaj quramynda bolyp, zardap shekken turǵyndardy evakýatsııalaýǵa, gýmanıtarlyq kómekti jetkizýge atsalysty. Osy eńbegi úshin ol Áýe qorǵanysy kúshteri Bas qolbasshylyǵynyń Alǵys hatymen marapattalǵan.

— Bul — búkil ekıpajdyń ortaq eńbegi. Sol syn saǵatta el senimin aqtaý — biz úshin eń basty mindet. Bul tájirıbe maǵan avıatsııanyń tek áskerı mindetterdi oryndaýda ǵana emes, halyqqa kómek kórsetýde de asa mańyzdy ekenin uqtyrdy. Mundaı gýmanıtarlyq jumystar — atqaratyn qyzmetimizdiń bir qyry ǵana, al el múddesine qatysty tapsyrmalar budan da aýqymdy, — deıdi ol.

Ushqyshtyń aıtýynsha, áýege kóterilý barysynda qaýipsizdik basty orynda turady.

— Ushý kezinde áýe kemesiniń tehnıkalyq jaǵdaıy, ekıpajdyń úılesimdi jumysy jáne aýa raıy — negizgi faktorlar. Áskerı tapsyrmalardy oryndaýda ýaqyttyń da mańyzy zor. Ár sheshim naqty ári jedel qabyldanýy tıis, — deıdi ol.

Áskerı avıatsııada jaýapkershilik pen tártip bólek. Munda ár ushý jaı ǵana reıs dep túsindirilmeıdi, ol naqty tapsyrma bolyp júkteledi. Ár buıryqtyń artynda memleket múddesi turady. Olar arnaıy tapsyrma oryndap, tótenshe jaǵdaılarda jumylyp jaýapty mindetterdi atqarady. Keıde ýaqytpen jarysady, keıde kúrdeli meteojaǵdaıda jumys isteıdi. Ár kókke kóterilý kásibılikpen qatar minezdi de synaıdy.

— Meniń jumysymda senim óte mańyzdy ról atqarady. Eń aldymen, komandırge degen senim berilgen tapsyrmanyń durys josparlanǵanyna jáne onyń oryndalý maqsatyna tolyq kóz jetkizýge múmkindik beredi. Tehnıkaǵa degen senim de asa mańyzdy, sebebi áýe kemesiniń senimdiligi men jaramdylyǵy ushý qaýipsizdiginiń negizi. Degenmen bul senim árdaıym muqııat tekserýmen jáne baqylaýmen qatar júredi. Al óz-ózińe degen senim — durys ári jedel sheshim qabyldaýdyń kepili. Áskerı ushqysh retinde barlyq jaǵdaıda sabyr saqtap, alǵan bilim men tájirıbege súıene otyryp, áreket etý qajet. Osy úsh senim bir-birimen tyǵyz baılanysty jáne qyzmettiń tabysty oryndalýyna negiz bolady, — deıdi jas ushqysh.

El tynyshtyǵyn qorǵaýda avıatsııanyń róli asa mańyzdy. Avıatsııa áýe shekarasyn baqylap, kez kelgen qaýiptiń aldyn alý múmkindigin beredi. Ol aqparat jınaý, jaýyngerlik jáne qorǵanys tapsyrmalaryn oryndaý arqyly jerdegi kúshterdiń áreketin tolyqtyrady. Sonymen qatar avıatsııa tótenshe jaǵdaılarda jedel áreket etip, strategııalyq nysandardy qorǵaýǵa, azamattardy evakýatsııalaýǵa jáne qaýip-qaterdi boldyrmaýǵa múmkindik beredi.

— Qıyn sheshim qabyldaýda kóbine bilimime, tájirıbeme jáne jaǵdaıdyń naqty sıpattamasyna súıenemin. Ushqysh úshin emotsııa men bir sáttik pikirlerge sený qaýipti, sondyqtan ár áreket logıkalyq, kásibı negizde jáne qaýipsizdik talaptaryna sáıkes bolýy tıis. Sonymen qatar ekıpaj múshelerimen ózara túsinistik pen tájirıbe almasý da mańyzdy. Qıyn jaǵdaıda árbir aqparatty salystyryp, múmkindikterdi baǵalap, eń durys sheshimdi tez ári senimdi túrde qabyldaýǵa tyrysamyn, — deıdi Álı Orynbaev.

Sonymen qatar Álı Orynbaev Qazaqstan Respýblıkasy Qarýly Kúshteriniń ambassadory retinde áleýmettik jelilerde belsendi. Ol Instagram jáne TikTok platformalarynda áskerı qyzmettiń erekshelikterin tanystyryp, jastardy Otan qorǵaýǵa úndep júr. Osy baǵyttaǵy eńbegi úshin Qorǵanys mınıstrligi tarapynan marapattalǵan.

— Ushqysh bolý — tek mamandyq emes, úlken jaýapkershilik. Ár ushýdyń artynda el senimi tur. Sondyqtan ár tapsyrmany barynsha dál ári kásibı oryndaýǵa tyrysamyn, — deıdi jas ofıtser.

Álı Orynbaev aldaǵy ýaqytta áýe qorǵanysy kúshteri salasynda joǵary jetistikterge jetip, elge adal qyzmet etýdi maqsat etedi.

Buǵan deıin, aqtaýlyq krımınalıst — Hanshaıym Bekbolatovanyń qyzmeti týraly jazǵan bolatynbyz.