Aqtaýda jarty jyldan beri jalaqy almaǵan muǵalimder jumysyn toqtatty
AQTAÝ. KAZINFORM — 27 shaǵyn aýdanda ornalasqan «Álfarabı» jekemenshik mektebiniń jıyrmadan astam muǵalimi jalaqy almaı 6 aı jumys istegen. Olarǵa jazdaǵy eńbek demalysynyń da qarajaty tólenbepti. Ashynǵan ustazdar sabaq ótkizýden bas tartyp, jumysty toqtatty.
— Jalaqy bolmaǵan soń zeınetaqy qoryna da aqsha túspeıdi. Oǵan qosa mindetti medıtsınalyq saqtandyrý qoryna bir tıyn aqsha túsken joq. 6 aı boldy eńbek demalysynyń aqysyn áli alǵan joqpyz. Aqshamyzdy surasaq esepshotymyz jabyq dep túrli syltaý aıtady, — deıdi muǵalimderdiń biri Rahat Sháýdirbaeva.
Jeke menshik bilim ordasynda 1 myńǵa jýyq oqýshy oqıdy. Mektep dırektorynyń sózinshe, bilim berý uıymy byltyr bankrot bolyp, qaıta aıaqqa turǵan.
— Qolhat berilip, aldyn ala túsindirme jumystary júrgizildi. Zeınetaqy qory men medıtsınalyq saqtandyrý boıynsha kelisimin bergen ustazdarǵa aqsha aýdaryldy, aqshasy áli túspegen mamandar da bar. Ol endi jeke qyzmetkerlerdiń ózimen kelisim-shart boıynsha júrgizilip jatyr. Qazirgi tańda qazan aıynyń jalaqysyn almaǵan 20 shaqty muǵalim bar olarǵa da aılyqtary túsip jatyr. Mekeme qazir qıyn jaǵdaıda tur. Biraq, másele sheshilip jatyr, — deıdi jekemenshik lıtseıdiń quryltaıshysy Erkebulan Nurhanuly.
Aqtaý qalalyq bilim bólimi basshysy Ǵanı Qurmanǵalıevtiń aıtýynsha, jeke menshik mektep tikeleı Oqý aǵartý mınıstrligi janynan qurylǵan «Qarjy» ortalyǵymen jumys isteıdi. Qarjy mınıstrlikten bólinedi.
Osy oqıǵadan keıin mektep dırektory muǵalimderdiń jalaqysyn jyl sońyna deıin tóleýge ýáde berdi.
Eske sala keteıik, buǵan deıin Almaty oblysynda muǵalimderge jarty jyl jalaqy tólenbegenin jazǵan bolatynbyz.