Aqtaýda jartastyń boıymen soqpaq jol salý josparlanýda
ASTANA. QazAqparat - Aqtaýda jartastyń boıymen soqpaq jol salý josparlanýda. Jobanyń basty ereksheligi - sholý alańdary, sarqyramalar men pırsteri bar jartasty boılaı jaıaý júrginshi joldarynyń bolýynda, dep habarlaıdy «Moı GOROD» portaly.
Joba jasaýshylardyń pikirinshe, atalmysh soqpaq jol Aqtaýdyń kórikti jerleriniń birine aınalmaq.
Joba boıynsha soqpaq jol jartasty boılaı 1600 metrge sozylady. Soqpaq joldy tastardy buzbaı, tabıǵı bedermen úılestirip salady. Bul jobada túrli demalys aýmaǵy bar 24 sholý alańy qarastyrylǵan. Qaýiptilik deńgeıi joǵary jerlerde trotýarlardyń boıyna tutqalar qoıylmaq. Sholý alańynda: 30 oryndyq kólik turaǵy, dárethana men polıtsııa beketi bolady. Sholý alańynyń ortalyǵynda kún saǵattary ornalastyrylady.
«Munyń barlyǵy polımerlik kompozıttiń berik aǵash-materıalynan jasalynady. Ol arnaıy bizdiń óńir úshin istep shyǵarylǵan. Onyń paıdalaný merzimi 20 jyldan asady. Jartasty boılaı ornalasqan trotýardyń barlyq jerine polıtsııa pýltine jalǵanǵan vıdeobaqylaý kameralary qoıylady. Jartasty alaptyń eki ýchaskesine joba boıynsha Mańǵystaýdyń tarıhynan syr shertetin slaıdtar kórsetiledi», - dedi joba jasaýshysy Marat Sıýnıkov.
Qurylystyń aldyn ala quny 1 mıllıard 200 mıllıon teńgeni quraıtyny atalyp ótildi. Bul jobany júzege asyrý úshin qalalyq ákimdik ınvestorlar izdeýge nıetti. 
