Aqtaýda jarys kezinde bolǵan kıkiljińge mınıstrlik túsinik berdi

AQTAÝ. KAZINFORM — 5 jeltoqsan kúni Aqtaý qalasynda ótip jatqan bokstan jastar arasyndaǵy Qazaqstan chempıonaty kezindegi oqys jaǵdaıǵa baılanysty QR Týrızm jáne sport mınıstrligi túsinik berdi. 

– Atalǵan jekpe-jek kúni Aqmola oblysynyń ókili Damır Ibragımov pen Astana qalasynyń sportshysy Kenesaryámir Marjyqpaev kezdesýinen soń, Astana qalasynyń jattyqtyrýshysy (K. Marjyqpaevtyń ákesi) Erik Marjyqpaev tóreshiler sheshimine narazylyq bildirip, daýdyń sońy kıkiljińge ulasty, - delingen habarlamada.

Alaıda emotsııasy basylǵannan keıin Erik Marjyqpaev birden tóreshilerden keshirim suraǵan. Osy oqıǵadan soń Qazaqstan boks federatsııasy Atqarýshy Komıtettiń otyrysyn ótkizdi.

– Otyrys nátıjesinde Marjyqpaev E. bapkerlerdi, tóreshilerdi, jarys uıymdastyrýshylaryn qurmettemegeni úshin jáne QR sporttyq etıkasyn buzǵany úshin bokstan jergilikti, respýblıkalyq jáne halyqaralyq jarystardan 2 jylǵa shettetildi, - dep habarlady vedomstvodan.

Sport – bul tek jarys alańy ǵana emes, emotsııanyń ortasy ekenin de umytpaǵan abzal. Degenmen, aldaǵy ýaqytta Mınıstrlik mundaı jaǵdaılardyń qaıtalanbaýy jáne oqys oqıǵalardyń aldyn alý úshin naqty sharalardy qolǵa alyp, profılaktıkalyq jumystardy kúsheıtedi.

Eske sala keteıik, 5 jeltoqsan kúni Aqtaý qalasynda bokstan jastar arasyndaǵy Qazaqstan chempıonaty kezinde Aqmola oblysynyń sportshysy Damır Ibragımov pen Astana qalasynyń ókili Kenesaryámir Marjyqpaev kezdesti. Jekpe-jek 4:1 esebimen Ibragımovtyń paıdasyna aıaqtaldy.

Nátıje jarııalanǵan soń Astana qalasynyń jattyqtyrýshysy (K. Marjyqpaevtyń ákesi) Erik Marjyqpaev tóreshiler sheshimine qarsylyq bildirip, daýys kóterdi, keıin teketires oryn alyp, ol tóreshilerge fızıkalyq kúsh kórsetken edi.