Aqtaýda jappaı súıisý sharasy ótedi degen aqparat jalǵan - ákimdik
AQTAÝ. QazAqparat - Aqtaýdaǵy saýda oryndarynyń birinde jappaı súıisý sharasy ótetini týraly aqparat joqqa shyǵaryldy,-dep habarlaıdy QazAqparat tilshisi.
Osyǵan deıin 14 aqpan kúni «Akkala mall» saýda úıinde osyndaı shara bolatyny týraly aqparat jergilikti BAQ betterinde jarııalanǵan edi. ıAǵnı, áýlıe Valentın kúnine oraı jappaı súıisý sharasy bolady dep josparlanǵan. Oǵan ǵashyqtar qatysýǵa bolady delingen.
Bul habarǵa jeli qoldanýshylary qarsylyq bildirip, munyń ulttyq mentalıtetke jat qylyq ekenin aıtyp, jarysa jazdy.
Degenmen, búgin Mańǵystaý oblystyq ishki saıasat basqarmasynyń basshysy Jansaıa Ismaǵulova Feısbýktegi paraqshasynda aqparattyń jalǵan ekenin habarlady.
«Qurmetti Aqtaý qalasynyń turǵyndary! Shahardaǵy saýda ortalyqtarynyń birinde jappaı súıisý sharasy bolady degen aqparat shyndyqqa saı emes. Sondyqtan alańdaýǵa eshqandaı negiz joq dep esepteımin»,- dep jazdy ol.
