Aqtaýda jańbyrdan keıin kóshelerdi sý basty
AQTAÝ. KAZINFORM — Aqtaý qalasynda tolassyz jaýǵan jańbyrdan keıin birneshe ortalyq kóshede sý jınaldy. Qalada jańbyr sýyn sorý jumysy júrgizilip, jaýapty mekemelerge joldardy retke keltirý tapsyryldy.
7 qarashada Aqtaý qalasynda jaýyn-shashyn saldarynan birqatar ortalyq jolda jańbyr sýy jınalǵan. Osyǵan baılanysty Mańǵystaý oblysy ákiminiń orynbasary Bekbol Orynbasarov joldardy kútip ustaýǵa jaýapty «Green City Aktau» JShS dırektorynyń jumysyna syn aıtyp, eskertý jasady.
Qalalyq ákimdiktiń taratqan aqparatyna súıensek, oblys ákiminiń orynbasary merdiger mekemege jumystardy kúsheıtip, sý jınalǵan aýmaqtardy jedel retke keltirýdi tapsyrdy.
— Sý jınalǵan aýmaqtardy retke keltirý úshin jeke kásipkerlerdi jumyldyryńyzdar. Dál qazirden bastap tehnıka sanyn kóbeıtińizder, — dedi aımaq basshysynyń Bekbol Orynbasarov.
Qazirgi ýaqytta Aqtaý qalasynyń 31-shaǵynaýdanyndaǵy «Hazar Bazary» saýda bazary mańynda jańbyr sýyn sorý jumysy júrgizilip jatyr. Oblys aýmaǵyndaǵy sý jınalǵan ýchaskelerde Tótenshe jaǵdaılar departamentiniń qyzmetkerleri de jumys istep jatyr.
Mańǵystaý oblystyq TJD málimetinshe, 8 qarashada óńirde jańbyr, keı jerlerde qatty jańbyr kútiledi. Jeldiń ekpini 15–20 m/s-qa deıin jetýi múmkin.
Tótenshe jaǵdaılar departamenti turǵyndardy saqtyq sharalaryn saqtaýǵa, asa qajettilik bolmasa, alys jolǵa shyqpaýǵa shaqyrdy.
Aıta keteıik, 8 qarashada eldiń 17 oblysynda, sondaı-aq Astana men Almaty qalalarynda aýa raıyna baılanysty eskertý jarııalandy. Sınoptıkter jaýyn-shashyn, kóktaıǵaq, tuman, jeldiń kúsheıýi jáne joǵary órt qaýpi bolatynyn boljaıdy.
