Aqtaýda jańadan salynǵan kópqabatty úıler talapqa saı emes
AQTAÝ. QazAqparat - Aqtaý qalasynyń ákimdigi kópqabatty úılerdi talaptardy buza otyryp salǵan qurylys kompanııalaryn sotqa berdi, dep habarlaıdy QazAqparat «Habar 24» telearnasyna silteme jasap.
Qurylysshylar jobada kórsetilgen 5 qabattyń ornyna 6 qabat turǵyzǵan. Qazirgi tańda eskızdik jobadan aýytqyǵan 8 úı anyqtalyp otyr. Onyń 5-eýin merdiger kompanııalar turǵyndarǵa satyp úlgergen. Turǵyn úılerdiń ekeýi byltyr, al úsheýi bıyl paıdalanýǵa berilgen.
Bul rette, 5 úıden turatyn turǵyn úı keshenin salǵan qurylys kompanııalardyń biriniń basshylyǵy altynshy qabatty zańdastyrý úshin qalalyq ákimdikke ótinish bildirgen. Biraq jergilikti bılik kompanııa ókilderiniń ústinen mamandandyrylǵan ekonomıkalyq sotqa shaǵym túsirdi. Elimizdegi turǵyn úı qurylysyna qoıylatyn talapqa sáıkes, ǵımarat 5 qabattan joǵary bolsa, mindetti túrde lıft ornatylýy tıis.
Aqtaý qalalyq sáýlet jáne qurylys bólimi basshysynyń mindetin atqarýshy Álıma Toqtarovanyń aıtýynsha, qurylys kompanııalarynyń eshbirinde úleskerlerdiń qatysýymen úı turǵyzýǵa ruqsaty joq.
«Úleskerlik qatysý týraly zańnamaǵa sáıkes, qurylys salýshy kompanııa úlestik qatysýmen turǵyn úı salýǵa ruqsat alýy tıis. Biraq birde-bir kompanııa bul ruqsatty almaǵan. Sondyqtan, mundaı qurylystarǵa aqsha salmaý qajzettigi týraly halyqty udaıfy eskertemiz. Eger baspanany resimdeıtin bolsa notarıýsqa júginý qajet nemese eksplýatatsııaǵa engizý aktisi bolǵan kezde fakti boıynsha satyp alý kerek», - dedi ol.
Málim bolǵandaı, zańsyz kóterilgen altynshy qabattar buzylatyn bolady.
«Memlekettik sáýlet qurylys basqarmasyna hat joldanyp, qazirgi tańda 6-qabatty buzý jóninde jumystar júrgizilip jatyr. Salynǵan qurylysty buzý úshin mamandandyrylǵan sotqa hat joldandy», - dedi qalalyq sáýlet jáne qurylys bóliminiń mamany Shalqar Erbolǵanov.
