Aqtaýda jańa jyldyq bezendirýge qansha qarjy jumsalatyny belgili boldy

AQTAÝ. KAZINFORM – Bıyl shyrsha teńiz jaǵalaýyndaǵy «Amfıteatr» alańyna jáne 19 A shaǵyn aýdandaǵy Ábish Kekilbaev murajaıynyń aldyna tigiledi. 

Aqtaý qalalyq turǵyn-úı kommýnaldyq sharýashylyǵy bóliminiń málimetinshe, jańa jyldyq bezendirý jumystary jeltoqsan aıynyń 17-24 aralyǵynda júrgiziledi. Shyrshalarmen qatar kósheler de bezendirilip, fotoaımaqqa arnalǵan kishi sáýlet formalary ornatylady. 

- Ortalyq kóshede (14 pen 12 shaǵyn aýdandar, 14 pen 11 shaǵyn aýdandar arasynda) butalardy jaryq dıodty torly gırlıandylarmen bezendirý jáne úlken shyrsha aǵashtaryn jaryq dıodty gırlıandylarmen bezendirý jumystary júrgiziledi, - delingen habarlamada.

Bıyl jańa jyldyq bezendirý jumystaryn memlekettik satyp alý konkýrstyq is-sharalary negizinde jeke kásipker «Aktau Print» merdiger mekemesi jeńip alǵan. Kelisim-shart somasy – 76 mln teńgeni quraıdy. 

Eske sala keteıik, buǵan deıin Jetisý oblysynyń ortalyǵy Taldyqorǵandy jańa jyldyq bezendirýge bıyl jergilikti bıýdjetten 35 960 341 teńge bólingenin jazǵan edik.