Aqtaýda jańa úsh júzdeı jumys orny ashylady

NUR-SULTAN. QazAqparat – Aqtaý qalasynda bıyl jańa 300-deı jumys orny ashylmaq, dep habarlaıdy QazAqparat qalalyq ákimdiktiń baspasóz qyzmetine silteme jasap.

Aqtaý qalasynyń ákimi Ǵalymjan Nııazovtyń aıtýynsha, 2019 jyly bıtým negizinde qatty jáne suıyq gıdrooqshaýlaǵysh materıaldardy óndirý zaýyty iske qosylyp, jańadan 25 jumys orny ashyldy. Osy jyly 3 joba: njınırıngtik-bolat konstrýktsııalardy, mobıldi teńiz konteınerlerin, kárzeńkeler men kompozıtsııalardan jáne skıpterden jobalaý men daıyndaý boıynsha montajdyq keshen, polıpropılen qaptamasyn, hımııalyq, rezeńke jáne plastıkalyq buıymdardy óńdeý zaýyty jáne mashınalar men jabdyqtardan basqa, metallýrgııa ónerkásibi, daıyn metall buıymdaryn óndirý zaýyty iske qosylyp, 295 jumys orny ashylady.

Resmı derekterge sáıkes, qala boıynsha 79,9 myń adamdy jumyspen qamtyp otyrǵan 31 011 shaǵyn jáne orta kásipkerlik sýbekti jumys isteıdi. Ol qalanyń jumys isteýge qabiletti turǵyndarynyń 84,9 paıyzyn qurap otyr.

Sondaı-aq, ótken jyly 225 jańa jumys ornyn ashatyn 35 joba nesıelendirilip, 232 adam kásipkerlik negizderin oqý kýrstarynan ótken. Azamattardy kásipkerlikke tartý maqsatyndaǵy «Eńbek» nátıjeli jumyspen qamtý jáne jappaı kásipkerlikti damytý baǵdarlamasy aıasynda 127 jumys orny bar 68 joba qarjylandyrylady.

Qalada azyq-túlik baǵasyn turaqtandyrý maqsatynda 3 gıpermarket jáne 17 sýpermarketpen Memorandým jasaqtaldy. Byltyr jyl boıyna 65 ret aýyl sharýashylyǵy ónimderi jármeńkesi uıymdastyrylyp, jaz mezgilinde kásipkerlerdi qoldaý maqsatynda 299 saýda núktesine oryn berildi.

Qala basshysy halyqpen kezdesýinde keltirgen málimetke saı, bıyl egin egýge, jylyjaı salýǵa talaptanǵan kásipkerlerdi qoldaý úshin qalaǵa jaqyn jerden 100 gektar jer bólinip otyr. Qalanyń sáýlettik kelbetine kórik berý jáne týrızmdi damytý maqsatynda amfıteatr, jasyl alańqaılar, jarqabaqtyń tabıǵı qalpyn saqtaı otyryp salynǵan «Jartasty soqpaq» el ıgiligine berildi. Zamanaýı talaptarǵa saı «Holıdeı ıın» qonaq úıi jáne «Dostar» demalys oryndaryndaǵy akvaparkterdiń iske qosylýy josparlanyp otyr.

«Bir mezette myńǵa jýyq adamdy qabyldaıtyn bes juldyzdy «Rixos» demalys ortalyǵynyń ashylýy osy jyldyń maýsym aıyna josparlanǵan. Osy qonaq úıge qyzmet etetin 600 jańa jumys orny ashylmaq. Búgingi tańda osy azamattardy Týrızm kolledjinde tegin oqytyp, onyń ishinen 200 adamdy «Sembol Construction and Engineering» kompanııasy tájirıbe alýǵa shetelge jiberedi. Kásipkerlikti damytý – jumyssyzdyq deńgeıin tómendetýdiń alǵysharty,ári naryqty damytýdyń kepili.Sondyqtan, ár kásipkerge qoldaý men qolaıly jaǵdaı jasaý - mindet», - dedi Ǵalymjan Nııazov.