Aqtaýda jańa balabaqsha ashyldy
AQTAÝ. QazAqparat - Mańǵystaý oblysynyń ákimi Eraly Toǵjanov jańa balabaqshanyń ashylý saltanatyna qatysty. Bul týraly QazAqparat ákimniń baspasóz qyzmetine silteme jasap habarlaıdy.
240 oryndyq bóbekjaı memlekettik-jekemenshik áriptestik mehanızmi aıasynda júzege asty. 35 jumys orny qurylǵan. Sondaı-aq, «Montessorı», logoped, akt jáne mýzyka zaly qarastyrylǵan.
«Elbasymyz «Bala tárbıeleý - bolashaqqa eń úlken ınvestıtsııa. Biz bul máselege osylaı qarap, balalarymyzǵa jaqsy bilim berýge umtylýymyz kerek», - degen bolatyn. «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» atty Qazaqstan halqyna Joldaýynda Prezıdentimiz Nursultan Ábishuly Nazarbaev mektepke deıingi mekemelerde oryndar tapshylyǵyn túbegeıli qysqartýdy basty máselelerdiń biri etip kóterdi. Sondyqtan biz óńirimizde balabaqshalar salý máselesine asa nazar aýdaryp kelemiz. Aǵymdaǵy jyly memlekettik-jekemenshik áriptestik aıasynda 5 balabaqsha ashylady. Búgin sonyń biri jumysyn bastady. 2018 jyldyń sońyna deıin memlekettik-jekemenshik áriptestik aıasynda 1120 oryndyq taǵy 4 balabaqsha salamyz», - dedi oblys ákimi Eraly Toǵjanov.
Aǵymdaǵy jyly 2895 oryndyq 24 balabaqsha paıdalanýǵa beriledi. Balabaqsha ashýda oblys kásipkerleri belsendilik tanytýda. Qazirdiń ózinde 714 oryndyq 10 jekemenshik balabaqsha ashyldy.
