Aqtaýda jalǵyz ózi teńizde shomylyp júrgen 3 jasar balaqaı qutqaryldy
Osy kórinisti Aqtaý turǵyny kameraǵa túsirgen. Onyń aıtýynsha, kishkentaı balaqaıdy jaǵalaýdy patrýldep júrgen polıtseıler taýyp alǵan.
«Bul jaǵajaıda karantın kezinde shomylýǵa tyıym salynǵan. Biraq kishkentaı bala shomylý úshin teńizge qaraı bara jatty. Polıtsııa qyzmetkerleri búldirshindi baıqap qalyp, ony sýdan shyǵardy. Janynda úlkenderden eshkim joq. Ata-analar, balalaryńyzǵa abaı bolyńyzdar» deıdi oqıǵany túsirip alǵan aqtaýlyq áıel.
Oblystyq polıtsııa departamentiniń málimetinshee, bul jaǵdaı búgin bolǵan. Bóbektiń jasy nebary úshte. Jaǵalaýdaǵy úılerdiń birinde turady.
«Endi ǵana teńizge túsip, shomyla bastaǵan balaqaıdy bizdiń polıtseıler der kezinde baıqap qaldy. Bir polıtseı búldirshindi alyp shyǵý úshin teńizge túsýge májbúr boldy, óıtkeni bala jaǵalaýdan birshama alysqa ketip úlgergen edi. Ony sýdan alyp shyqqan kezde ápkesi keldi. Ol jarty saǵattan beri balany tappaı, sharq uryp izdep júrgen eken. Bala tátesine tapsyryldy» dep túsindirdi oblystyq polıtsııa departamentinen.